Tabaku argumenton se një shumicë që vepron me dy standarde për drejtësinë, thellon krizën

Deputetja e Partisë Demokratike, Jorida Tabaku analizoi sot përmes një videomesazhi në rrjetet sociale moszbatimin, sipas saj të vendimeve të Gjykatës Kushtetuese nga mazhoranca. Sipas saj, ky është një tjetër shembull i qartë se si shumica po vepron në kundërshtim me parimin e barazisë përpara ligjit.

Në postimin e saj, Tabaku argumenton se një shumicë që vepron me dy standarde për drejtësinë jo vetëm që minon rendin kushtetues, por edhe thellon krizën ekonomike që ndjehet në tryezat e çdo familjeje shqiptare. Ajo thekson se vendimet e mazhorancës janë një reflektim i mungesës së përgjegjshmërisë dhe vullnetit për të respektuar ligjin në mënyrë të barabartë për të gjithë.

Demokratja nënvizoi gjithashtu se mazhoranca që nuk zbaton vendimet e Gjykatës Kushtetuese është e njëjta që ka votuar ligje të hartuara sipas interesave të ngushta.

Këto ligje, sipas Tabakut, jo vetëm që kanë dëmtuar ekonominë, por kanë qenë shkak kryesor për rritjen e çmimeve dhe përkeqësimin e gjendjes financiare të qytetarëve.