Anëtarë të komisionit parlamentar për të Drejtat e Njeriut zhvilluan sot takime në Mal të Zi me ministrin e Energjisë dhe Minierave, Admir Šahmanović, dhe me ministren e Çështjeve Europiane, Maida Gorčević. Kryetarja e komisionit, Jorida Tabaku informoi se me ministrin Šahmanović u diskutua për forcimin e bashkëpunimit dypalësh dhe të marrëdhënieve ekonomike ndërmjet Shqipërisë dhe Malit të Zi, veçanërisht në fushën e energjisë, gazit, infrastrukturës energjetike dhe qendrave të të dhënave. Shqipëria duhet të jetë një partnere serioze për Bashkimin Europian, Shtetet e Bashkuara të Amerikës dhe vendet e rajonit, duke ndërtuar bashkëpunime konkrete dhe afatgjata.
“Vëmendje të posaçme i kushtuam nevojës për më shumë investime në qytetet dhe zonat ku jetojnë shqiptarët dhe ku ata zhvillojnë bizneset e tyre. Shqipëria duhet t’i ketë gjithmonë në vëmendje shqiptarët në Malin e Zi, të drejtat, nevojat dhe përfaqësimin e tyre. Shqiptarët e Malit të Zi duhet të përfaqësohen denjësisht në Parlamentin malazez dhe të kenë hapësirën e merituar në kodin e ri zgjedhor, në jetën politike, ekonomike dhe në vendimmarrje”, tha Tabaku.
Ndërsa me ministren Gorčević u diskutua për procesin e integrimit europian dhe përvojën e Malit të Zi në këtë rrugëtim. “Mali i Zi nuk është rastësisht vendi që ka avancuar më shumë në procesin e integrimit europian. Pas këtij progresi qëndron një angazhim i qartë politik, një administratë e përqendruar te reformat dhe një proces që trajtohet si prioritet kombëtar. Po aq e rëndësishme është mënyra se si agjenda europiane ndahet dhe diskutohet me opozitën, Parlamentin dhe aktorët e tjerë. Integrimi nuk është pronë e një qeverie, por një projekt kombëtar. Ky është një mësim që duhet ta marrë edhe Shqipëria”, tha ajo.
Sipas Tabakut, qeveria shqiptare nuk ka asnjë arsye ta mbajë të mbyllur procesin e integrimit në zyrat e burokracisë. “Ajo duhet të ndajë me transparencë agjendën e negociatave, prioritetet, sfidat dhe rrugën që po ndjek, jo vetëm me opozitën, por me të gjithë shqiptarët. Vetëm një proces i hapur, transparent dhe gjithëpërfshirës mund të ndërtojë besim dhe të garantojë reforma të qëndrueshme. Integrimi europian nuk bëhet me propagandë apo me komunikim njëkahësh. Ai kërkon dialog, përgjegjësi dhe përfshirje. Ky është shembulli që jep Mali i Zi. Ky është edhe standardi që duhet të ndjekë Shqipëria”, tha Tabaku.
Gazement Bardhi vlerësoi mënyrën se si agjenda europiane ndahet dhe diskutohet me opozitën, Parlamentin dhe aktorët e tjerë, kohë përpara se të vijë zyrtarisht në Kuvend. “Integrimi nuk është pronë e një qeverie, por një projekt kombëtar. Vetëm një proces i hapur, transparent dhe gjithëpërfshires mund të ndërtojë besim dhe të garantojë reforma të qëndrueshme. Ky është shembulli që jep Mali i Zi. Ky eshtë edhe standardi që duhet të ndjekë Shqipëria”, shtoi ai.