Deputetja e Partisë Demokratike, Jorida Tabaku, tha sot nga blloku i Sigurisë se 250 të mitur janë mes mbi 1 mijë të rinjve të arrestuar ose të shoqëruar nga policia gjatë nëntë ditëve të protestave në Tiranë.
“Mbi 1 mijë të rinj janë arrestuar dhe shoqëruar gjatë këtyre nëntë ditëve të protestave. Mes tyre, 250 janë të mitur, të cilët nuk janë kursyer nga dhuna, goditjet dhe tërheqjet me forcë, edhe pasi është konstatuar se ishin të mitur. Ata janë të rinj që po kërkojnë një Shqipëri ndryshe.
“Sot takova dy 14-vjeçarë, të cilët thjesht ndodheshin në një cep të protestës, pa ushtruar dhunë dhe me duart në xhepa, por as ata nuk u kursyen. Madje, i pyesin se përse protestojnë!
Të rinjtë sot protestojnë pikërisht kundër kësaj dhune dhe përqendrimit të pushtetit. Ata kërkojnë një Shqipëri më të mirë.
Protestojnë për kushtet ekonomike të familjeve të tyre, për mungesën e meritokracisë, për më shumë mundësi dhe për një arsim më të mirë. Sot, ata po bëhen zëri i një Shqipërie që duhet patjetër të ngrihet. Një Shqipërie që po flet përmes zërit të tyre, që ka dalë në rrugë bashkë me të rinjtë dhe që po fiton gjithnjë e më shumë mbështetje.
Dhuna e policisë dhe tërheqjet me forcë në mes të rrugës, ndaj vajzave, të miturve dhe kujtdo tjetër, pa asnjë hezitim, tregojnë se Shqipëria sot është gjithçka, përveçse europiane.
Nuk mund t’i kërcënosh të rinjtë me heqjen e bursave. Nuk mund t’i kërcënosh mësuesit me pagat. Nuk mund t’i motivosh dhe t’i shpërblesh policët vetëm sepse ushtrojnë dhunë. Kjo nuk është Shqipëria europiane.
Dhe pikërisht një Shqipëri të tillë po kërkojnë këta të rinj: një Shqipëri europiane“, tha Tabaku.