Tahiri dhe Didi, të hënën para deputetëve për terrorizmin e “xhihadizmin”

Ministri i Brendshëm, Sajmir Tahiri dhe drejtori i Përgjithshëm i Policisë së Shtetit, Artan Didi, do të raportojnë ditën e hënë para Komisionit për Sigurinë Kombëtare për bandën e kokainës, valën e shpërthimeve me tritol dhe për depërtimin e ekstremistëve në Shqipëri, të kamufluar si refugjatë sirianë, të cilët kanë hyrë në territorin tonë nga veriu i Greqisë.

Seanca dëgjimore pritet të mbahen në orën 10:00, ndërsa pritet të karakterizohet nga polemika dhe debate të forta.Tahiri ishte parashikuar që të raportonte të hënën që kaloi, por seanca u shty për shkak të përmbytjeve në jug të vendit.

Referuar burimeve zyrtare të Kuvendit, Tahiri dhe Didi do të prezantojnë para deputetëve dhe t’u përgjigjen pyetjeve për gjendjen e sigurisё nё vend, kёrcёnimin nga terrorizmi dhe krimi i organizuar; për “xhihadizmin”, ekstremizmim dhe terrorizmin ndёrkombёtar si dhe për rreziqet dhe kërcënimet që paraqiten nga armatimi, municionet dhe eksplozivet e shumta që gjendej në dispozicion tё elementёve dhe strukturave kriminale.

Po ashtu, do të paraqitet edhe një plani masash pёr sigurinё pёrballё terrorizmit.