“Taksa progresive është e pandershme”/ Tabaku: Barrierë që takson dijen

Kryeministri Edi Rama ka deklaruar se javën që vjen do të bëjë publike ndryshimet për taksën progresive, por për Partinë Demokratike, kjo taksë është e pandershme.

Në një postim në Facebook, ish-deputetja e PD, Jorida Tabaku thotë se taksa progresive është një formë e pandershme që takson dijen dhe eksperiencën.

“Ka një arsye përse mjekët, infermierët, inxhinierët, specialistët e programimit, ekspertët  dhe bankierët mbajnë mbi supe peshën më të madhe të taksave në vend; Taksa Progresive. Kjo është forma më e pandershme e cila takson dijen, eksperiencën, njohurinë dhe kontributin arsimor që ju keni bërë për veten tuaj. Siç e shihni fasha nga 40 mijë lekë deri në 80 mijë lekë paguan 51% të vlerës totale të TAP në vend.

Taksa progresive nuk i jep më shumë para në xhep atij që ka investuar jetën e tij për të përmisuar njohuritë dhe dijet në punën që bën. Taksa progresive nuk është incentivuesja e punës, zanatit me të ardhura të larta. Ajo është një barrierë që takson dijen, mundin dhe përpjekjen e gjithsecilit për të rritur të ardhurat duke investuar në shkollim dhe punësim”, thotë Tabaku.

Sipas saj, PD po lufton për taksën e sheshtë, e cila do të rivendoset me ardhjen e të djathtës në pushtet. Sipas Tabakut, taksa e sheshtë nuk është një barrierë që pengon investimet.

“Prandaj ne po luftojmë për një taksë të sheshtë; që nuk do të jetë barriera e guximit tuaj për të investuar në dije, shkencë, sipërmarrje. Prandaj po ofrojmë taksën e sheshtë 9% për rrogën që pagat tuaja mos të taksohen 13% apo 23% siç sot qeveria e specialistëve të PPP ju takson. Ne besojmë tek aftësitë dhe zotësitë e individit, ne besojmë se mundësitë duhen shfrytëzuar dhe se gjithsekush duhet të gëzojë frytet e punës së tij.

Ditë më të mira do të vijnë për të gjithë. Për mjekët, inxhinierët, infermierët, ekonomistët dhe inxhinierët e programimit. Ne do ta rikthejmë Shqipërinë në punë duke hequr barrën e pandershme të taksës progresive për t’ju ofruar taksën e sheshtë të barazisë. Secili të gëzojë frytin e punës së tij pa u taksuar padrejtësisht!”,mbyll postimin e saj Tabaku.