Të 6-ët që do bëjnë sikur do të përzgjedhin presidentin e Republikës!

Sot nisin bisedimet për zgjedhjen e emrit të Presidentit apo Presidentes së Republikës.

Këtë të mërkurë në orën 17:00 do të zhvillohet mbledhja opozitë-pozitë. Nga radhët e opozitës do të jenë përfaqësuesit e tre grupeve parlamentare, Fatmir Mediu, Melisa Doda dhe Enkelejd Alibeaj, ndërsa mazhoranca do të përfaqësohet nga Taulant Balla, Damian Gjiknuri dhe Elisa Spiropali.

Pra këta të 6-të do të përcaktojnë kriteret për zgjedhjen e kreut të ri të shtetit shqiptar për pesë vitet e ardhshme. Në të vertetë PS-ja, siç e pohoi edhe kryeministri Rama, i ka vetë votat për ta zgjedhur emrin e Presidentit, sepse në raundin e fundit duhen vetëm 71 vota për ta zgjedhur, por për të krijuar imazhin e përzgjedhjes me opozitën, shumica po mbledh edhe Abilekaj, Doda dhe Mediun.

Në të vertetë emrin e saktë të kryetarit të shtetit e di vetëm Edi Rama, të gjithë të tjerët që bëjnë sikur dijnë, nuk dijnë asgjë.

Ndaj këta të 6-të do të mblidhen sot, do bëjnë sikur zgjedhin kriteret apo emrat dhe në fund kryeministri Rama do të jetë ai që do të thotë: Ky ose kjo do të jetë Numri Një i Shtetit.

Si formalitet, Presidenti Republikës është numri një i shtetit, por në të vertetë do të zgjidhet një që duhet të rrijë si dysh pas Edi Ramës.