Të ardhurat në buxhet rriten 11,7% në 8-mujorin 2026, arkëtohen 557,6 mld lekë

Të ardhurat totale në buxhetin e shtetit arritën në 557,6 miliardë lekë gjatë periudhës janar-gusht 2026, duke shënuar një rritje prej 11,7% krahasuar me të njëjtën periudhë të vitit të kaluar dhe një realizim prej 100,1% të planit.

Sipas statistikave të publikuara nga Ministria e Financave, mbi performancës paraprake të treguesve fiskalë të konsoliduar, të ardhurat u rritën me rreth 58,5 miliardë lekë në krahasim me 8-mujorin e vitit 2025.

Të ardhurat e arkëtuara nga Tatimet dhe Doganat arritën në 356,5 miliardë lekë, 25,1 miliardë lekë ose 7,6% më shumë se një vit më parë.

Të ardhurat tatimore të administratës tatimore u realizuan në 191,6 miliardë lekë, me një rritje prej 10,5%, ndërsa të ardhurat nga TVSH-ja neto në vend arritën në 56,8 miliardë lekë, 24,2% më shumë se në të njëjtën periudhë të vitit 2025.

Rritje prej 15,5% shënuan edhe të ardhurat nga tatimi mbi të ardhurat personale, duke arritur në 65,5 miliardë lekë. Ndërkohë, të ardhurat nga fondet speciale, që përfshijnë sigurimet shoqërore dhe shëndetësore, arritën në 134,1 miliardë lekë, me rritje 13,4% krahasuar me 8-mujorin e vitit të kaluar.

Ministria e Financave bën të ditur se, nga administrata doganore u mblodhën 165 miliardë lekë të ardhura, 6,9 miliardë lekë ose 4,4% më shumë se një vit më parë. Të ardhurat nga TVSH-ja në import arritën në 108,5 miliardë lekë, ndërsa ato nga akciza në 48,3 miliardë lekë.

Në krahun e shpenzimeve, shpenzimet e përgjithshme publike arritën në 496 miliardë lekë, me një realizim prej 95,6% të planit dhe rritje 8,2%, ose rreth 37,5 miliardë lekë më shumë se në 8-mujorin e vitit 2025.

Shpenzimet kapitale u realizuan në 56,7 miliardë lekë, 12,2% më shumë se një vit më parë, ndërsa shpenzimet korente arritën në 439,3 miliardë lekë, me rritje 7,7%.

Sipas të dhënave paraprake, diferenca mes të ardhurave dhe shpenzimeve të përgjithshme publike në 8-mujorin 2026 rezulton rreth 61,6 miliardë lekë.