Të dënuarit e drejtësisë shqiptare që fituan në Strasburg, gazetarja Hoxha: Nga Delijorgji te Thoma Gëllçi

Vijimi i masës “arrest me burg” ndaj kryetarit të Bashkisë së Tiranës, Erion Veliaj, ka rikthyer debatin mbi proporcionalitetin dhe mënyrën se si drejtësia shqiptare arsyeton kufizimin e lirisë. Në “Top Story”, gazetarja Anila Hoxha solli në vëmendje disa raste të shtetasve shqiptarë që kanë fituar në Gjykatën Evropiane të të Drejtave të Njeriut dhe më pas janë dëmshpërblyer nga shteti shqiptar.

“Drejtësia shqiptare ndahet në dy kohë, para dhe pas reformës në drejtësi. Një reformë në drejtësi që e ndau drejtësinë në dy kohë, vura re që i bashkon një emërues i përbashkët, një drejtësi e brishtë”. Hoxha përmendi rastet e Delijorgjit, Afërdita Hysit dhe Thoma Gëllçit, duke theksuar se edhe pas reformës në drejtësi ka pasur raste ku Strasburgu ka konstatuar shkelje.

“Këta shtetas, ndonëse me vonesë, kanë përfituar nga padrejtësia ndaj tyre”. Sipas gazetares, problemet lidhen veçanërisht me kohëzgjatjen dhe arsyetimin e masave të kufizimit të lirisë. “Thuhet që duhet të shkosh në burg, sepse ekziston rreziku t’i arratisesh drejtësisë. Shpallesh fajtor, pa e thënë drejtësia”.

Duke iu referuar kostos së vendimeve të Strasburgut për shtetin shqiptar, Hoxha u shpreh: “Kur fiton qytetari përpara shtetit, Strasburgu thotë që fatura paguhet nga shteti shqiptar”. Në fund, ajo e lidhi këtë problematikë edhe me rastin Veliaj dhe zvarritjen e proceseve gjyqësore. “Ne nuk kemi një drejtësi që të thotë nëse ke ose jo të drejtë dhe të zvarrit gjithë jetën. Ajo procedura i merr më qafë njerëzit”.