Të lidhur nga planeti. 140 pemë më shumë për kryeqytetin

Kjo javë filloi mbarë për qytetin e Tiranës. Kjo pasi Vodafone Albania në bashkëpunim me Bashkinë e Tiranës i dhuruan kryeqytetit 140 pemë, duke e çuar në rreth 900,000 numrin total të pemëve të mbjella në kryeqytet, gati 50% e normës së përcaktuar nga bashkia për t’u arritur deri në vitin 2030. Pemët u mbollën në parkun e Kopshtit Zoologjik, ku edhe nevoja është e madhe, pasi kjo hapësirë në kryeqytet është e re dhe ka nevojë për më shumë gjelbërim.

Katia Stathaki, drejtoresha e përgjithshme e Vodafone Albania, u shpreh se kjo është një dhuratë e punonjësve të Vodafone për qytetin ku jetojnë. Një kontribut për të ardhmen, diçka që na jep shpresë. “Shumë vite më vonë, kur ne të jemi plakur apo të mos jemi më në këtë botë, këto pemë do të jenë ende këtu për fëmijët tanë. Kjo është vetëm një pjesë e vogël e asaj që Vodafone po bën për planetin e klimën në Shqipëri dhe mbarë botën. Është pjesë e strategjisë sonë, krahas investimit paralelisht te makinat elektrike, energjia e rinovueshme, etj. Jemi shumë të lumtur që ndodhemi sot këtu dhe premtojmë të bëjmë më shumë në të ardhmen”, u shpreh Stathaki. “Keni mbështetjen tonë për gjithçka që ka rëndësi për qytetin”, shtoi ajo, duke iu drejtuar kryebashkiakut Veliaj.

Kjo nismë e ndërmarrë nga stafi i Vodafone Albania, ku shumica janë prindër fëmijësh të vegjël që vizitojnë Kopshtin Zoologjik rregullisht, u mirëprit dhe përshëndet nga z. Veliaj. “140 herë faleminderit për të 140 pemët nga Vodafone, nga miqtë tanë, që jo vetëm na ndihmojnë të komunikojmë përditë, të jemi më afër njëri-tjetrit, të mbarojmë punë, por edhe të tregojmë që kemi një përgjegjësi ndaj qytetit ku jetojmë. Dua të falenderoj të gjitha mamat e Vodafone, të cilat panë se në këtë përpjekje të transformimit total të Kopshtit Zoologjik na duhet ndihmë, sepse askush nuk ia del dot vetëm. Dhe sot na ndihmuan me 140 pemë, të cilat i janë shtuar qytetit. Dhe ku ka më shumë pemë, ka më shumë oksigjen. Shpresoj që Vodafone të frymëzojë kompani të tjera të bëjnë të njëjtën gjë”, tha Veliaj, teksa së bashku me znj. Stathaki mbollën personalisht njërën nga 140 rrënjët e pemëve, duke dhënë shembullin e tyre.

Shtimi i hapësirave të gjelbra në kryeqytet është prioritet i Vodafone, i cili njësoj si në mbarë botën edhe në Shqipëri i kushton një rëndësi të veçantë planetit, mjedisit dhe klimës, në kuadër të fushatës globale #SwitchToGreen.

Kontributi i Vodafone dhe Vodafone Albania Foundation për mjedisin në Shqipëri shkon në shifrën e rreth 14 milionë eurove. Kompania e sheh si përgjegjësi e detyrim angazhimin për një mjedis sa më të pastër dhe një planet të sigurt. Jo vetëm për të ardhmen e fëmijëve, por edhe për të tashmen e të gjithë banorëve të kryeqytetit. Së bashku ne mbjellim për një të ardhme më të gjelbër!