Tedi Papavrami: Historia ime në Shqipëri kontradiktore sipas epokave, nuk e kam humbur kurrë lidhjen

Violinisti Tedi Papavrami, i cili u nderua sot me “Yllin e Oficerit të Urdhrit Suprem të Shqiponjës”, u shpreh se pavarësisht gjithçkaje nuk ka humbur kurrë lidhjen me Shqipërinë. Papavrami u shpreh i emocionuar dhe i prekur për vlerësimin që mori sot në Tiranë.

“Është një ndjesi e çuditshme e kohës që kalon dhe e rrugëve të paparashikueshme të jetës. Në këtë sallë ndodhen shumë fytyra të njohura që nga fëmijëria ime më e hershme, shokët e lagjes me të cilët luaja që kur isha 3-4 vjeç, familjarë, profesorë, miq të familjes, edhe ti Edi që je një pjesë e kujtimeve të hershme si një figurë mbrojtëse për mua”, tha Papavrami, duke iu drejtuar kryeministrit Edi Rama i cili në emër të Presidentit të Republikës i dorëzoi “Yllin e Oficerit të Urdhrit Suprem të Shqiponjës”.

Ai kujtoi se historia e tij në këtë vend ka qenë sipas epokave, mjaft kontradiktore. ”Këtu kam njohur shumë herët dashamirësinë edhe admirimin e publikut edhe më pas me një kontrast shumë të shpejtë dhunën e refuzimit kur largimi ynë, mua dhe familjes na ktheu në armiq në sytë e regjimit me pasoja të padurueshme për familjen time, disa prej të cilëve ndodhen këtu sot”.

Papavrami nënvizoi se ky moment është diçka shumë e veçantë. ”Pavarësisht gjithçkaje, sigurisht unë nuk kam humbur kurrë lidhjen me Shqipërinë. Edhe përkthimi, rikthimi në gjuhën time nëpërmjet përkthimit të Ismail Kadaresë së madh qe një etapë shumë e papritur, shumë e bukur për të cilën unë gjithmonë do t’i mbetem mirënjohës Ismailit që më bëri këtë besim edhe që ishte një etapë që nga viti 2000 që më riktheu rrënjësisht, domethënë atë që shqipja ka mbase më të bukur që është gjuha e saj, që më prek gjithmonë në mënyrë shumë të thellë dhe që jam munduar të mos e harroj. Gjithë kjo ka mbetur brenda meje në jetën time dhe në muzikën time”, përfundoi Papavrami.