“Telefonata e fundit”/Si u kapën 3 trafikantët e kokainës në Tiranë

Aktualitet E Diel, 2 Maj 2021 09:29

Një aksion policor antidrogë në kryeqytet ka vënë në pranga 3 persona. “Panorama” mëson emrat e të arrestuarve: Ata janë: Sokol Geci, 22 vjec nga Tropoja, Eraldo Dodaj 19 vjec nga Mirdita dhe Pashk Teska 20 vjec nga Laci.

Gjithashtu janë sekuestruar 659 gram kokainë dhe 1 pistoletë. Operacioni u zhvillua nga Drejtoria e Policisë së Tiranës dhe Sektori i Antodrogës në Drejtorinë e Policisë.

Tre personat e arrestuar nuk i janë bindur urdhrit të policisë për ndaluar, ndaj edhe ka pasur të shtëna me armë në ajër.

Njoftimi i policisë

Më datë 04.10.2016, Specialistët e Seksionit për Hetimin e Narkotikëve në bashkëpunim me Forcën e Posaçme Operacionale në Drejtorinë Vendore të Policisë Tiranë si dhe Skuadrën Shqiponjat, kanë bërë të mundur finalizimin e operacionit antidrogë “Telefonata e fundit “, ku është bërë e mundur kapja në flagrancë e shtetasve:

1. Sokol Geci, 22 vjeç, banues në Tiranë.

2. Eraldo Dodaj, 19 vjeç, banues në Mirditë

3. Pashk Teska, 20 vjeç, banues në Laç

Arrestimi i këtyre shtetasve është bërë pas informacioneve që disponoheshin nga Specialistët e Narkotikëve dhe mbajties nën vëzhgim prej disa ditësh të aktivitetit të tyre, ku sot më datë 04.10.2016, në rrugën “5 Maj”, shtetasit e lartëpërmendur po udhëtonin në mjetin tip “Ford”, që drejtohej nga shtetasi Erald Dodaj.

Në momentin e ndalimit nga policia, shtetasi Sokol Geci, ka nxjerrë një armë zjarri dhe për pasojë shërbimet policore janë detyruar të bëjnë qitje në ajër për neutralizimin e më pas prangosjen e këtij shtetasi dhe të dy të tjerëve.

Gjatë kontrollit të ushtruar në automjet, në pjesën e pasagjerit, brenda kasave mbuluese të boksit të marshit në kabinën e mjetit është gjendur një qese, ku në brendësi të saj kishte lëndë të dyshuar narkotike “Kokainë”, me peshë 659 gramë.

Në cilësinë e provës materiale janë sekuestruar:

– 659 gramë lëndë e dyshuar narkotike e llojt Kokainë.

– 50 gramë lëndë e dyshuar narkotike e llojt Cannabis Sattiva (e gjetur në banesën e shtetasit Sokol Geci)

– 1 armë zjarri, model 54, i tip pistoletë TT

– 1 automjet tip “Ford”

– 4 aparate telefonik të llojeve të ndryshme

Materialet i’u referuan Prokurorisë pranë Gjykatës së Shkallës së Parë Tiranë, për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e armëve luftarake dhe e municionit”, parashikuar nga Nenet 283 dhe 278 të Kodit Penal.