Temperatura deri në 45 gradë! Alarm nga fenomeni “Super El Nino”: Shqipëria më e rrezikuar

Një valë e re shqetësimi po vjen nga institucionet ndërkombëtare të motit, për forcimin e fenomenit “Super El Niño”, i cili mund të ndikojë në motin global deri në vitin 2027. Sipas sinoptikanëve, rajoni i Ballkanit renditet mes zonave më të ekspozuara ndaj efekteve të këtij fenomeni klimatik. Temperaturat rekord, periudhat e gjata pa reshje dhe moti ekstrem pritet të jenë gjithnjë e më të shpeshta në Europën Jugore.

Në Shqipëri dhe në Greqi parashikohen valë intensive të të nxehtit, me temperatura që në periudha të caktuara mund të kalojnë 45 gradë Celsius. Po ashtu, rritet ndjeshëm rreziku për zjarre të mëdha pyjore, të favorizuara nga thatësira dhe temperaturat e larta.

Mali i Zi dhe Maqedonia e Veriut pritet të përballen me mungesë të zgjatur reshjesh, çka mund të ndikojë negativisht në rezervat ujore dhe sektorin bujqësor. Shkencëtarët theksojnë se ndryshimet klimatike po i bëjnë këto fenomene më të forta dhe më të shpeshta, duke rritur nevojën që vendet e rajonit të përgatiten për situata ekstreme të motit në vitet e ardhshme.