Persona me maska, nga turma, sulmojnë komisariatin nr.3 në Tiranë

Mbrëmjen e djeshme, pas një tubimi fillimisht paqësor të zhvilluar në bulevardin “Dëshmorët e Kombit”, protesta u përshkallëzua gjatë marshimit drejt Komisariatit Nr. 3, duke marrë një karakter më agresiv.

Një numër i konsiderueshëm protestuesish u grumbulluan përpara godinës së policisë, me pretendimin se brenda saj ndodheshin disa nga personat e ndaluar pas incidenteve të regjistruara të enjten, si para ashtu edhe gjatë seancës plenare në Kuvend. Situata u tensionua ndërsa turma qëndronte para institucionit, ku fillimisht u vendosën dhjetëra protestues në hyrje të komisariatit, përballë disa efektivëve të policisë që ndodheshin brenda dhe përpiqeshin të komunikonin dhe të kërkonin që turma të tërhiqej.

Megjithatë, situata nuk u normalizua, pasi një pjesë e protestuesve, disa prej të cilëve të maskuar, u pozicionuan në krye të turmës dhe nisën veprime të dhunshme ndaj godinës. Fillimisht u thyen xhamat e jashtëm të komisariatit, ndërsa më pas disa prej tyre arritën të depërtojnë në ambientet e brendshme, ku kanë dëmtuar orendi dhe pajisje të ndryshme që ndodheshin në holl.

Gjatë incidentit, një nga efektivet e policisë u lëndua në dorë teksa ndodhej përballë protestuesve dhe më pas është transportuar për ndihmë mjekësore në spital.

Pas përshkallëzimit të situatës, forcat e policisë ndërhynë me mjete të specializuara, përfshirë edhe autobotin e ujit, si dhe me një prani të shtuar efektivësh në terren. Falë ndërhyrjes, situata u vu nën kontroll brenda një kohe të shkurtër dhe u rikthye qetësia në zonë.

Ndërkohë, autoritetet kanë nisur hetimet për identifikimin e personave të përfshirë në akte dhune, ndërsa priten veprime të mëtejshme ligjore dhe arrestime shtesë në vijim.