Tentuan të kalojnë kufirin me mjete identifikimi false, procedohen 13 persona

Policia Kufitare e Rinasit ka proceduar penalisht 13 persona gjatë javës së fundit për “Falsifikimin të dokumenteve” dhe për “Kalim të paligjshëm të kufirit”.

Personat janë kapur me dokumente të falsifikuara, si pasaporta, karta identiteti, viza të vendeve të BE-së  duke tentuar të kalojnë kufirin.

Policia Kufitare ka marrë masa për përballimin e fluksit edhe në dalje, në ditët e para të vitit të ri, si dhe për një kontroll sa më efikas në drejtim të parandalimit dhe goditjes së paligjshmërisë.

Gjatë javës së fundit, në hyrje të Republikës së Shqipërisë nëpërmjet aeroportit të Rinasit, ka pasur një fluks të shtuar të qytetarëve.

Prej datës 23 dhjetor e deri sot kanë hyrë nëpërmjet aeroportit të Rinasit mbi 55 mijë qytetarë.