Ish-deputeti i Partisë Demokratike, Tritan Shehu thotë se nevojiten më shumë testime, e cila ndihmon në hapjen e vendit. Sipas tij, niveli i testimeve është sa në Afrikë. Nga ana tjetër, Shehu thekson se mungon strategjia dhe madje ngre shqetësimin se informacioni nuk është i qartë.
”Në Shqipëri ka një numër shumë më të madh të prekurish krahasuar me ato shifra të Ministrisë. Kjo është e lidhur me numrin shumë të vogël të testimeve, i cili është në të njëjtat nivele me vendet e Afrikës. Po ashtu, lidhet edhe me mungesën e plotë të testimit imunologjik, i cili këtu te ne është i bllokuar. Ky testim mund të realizohet në disa laboratorë të vendit. Për të realizuar atë që ka thënë OBSH-ja, ndryshimin e strategjisë, duhet kaluar nga një strategji mbrojtëse, në një strategji aktive, e cila ndihmon edhe në hapjen sociale. Po të shikosh të dhënat e ditëve të fundit, ka diçka kaotike dhe kjo ka lidhje me mosndjekjen siç duhet të kontaktit. Kjo lidhet me mosmarrjen e informacionit të qartë të simptomave që kanë njerëzit. E gjitha kjo ka ardhur nga mungesa e strategjisë, për të centralizuar çdo gjë në një dorë. Kjo sjell edhe dyshime te shifrat. Duhen shumë struktura të punojnë paralelisht”.