Tirana në ngërç, Kume për Veliajn: Zgjidhja do të jetë vendimi i Gjykatës së Lartë

Bashkia e Tiranës vijon të përballet me një situatë të ndërlikuar institucionale, ndërsa mënyra se si është trajtuar çështja e mandatit të kryebashkiakut Erion Veliaj ngre pikëpyetje mbi respektimin e procedurave ligjore.

Ish-kryetari i Komisionit Qendror të Zgjedhjeve, Kristaq Kume e konsideron rastin një shembull të qartë të mënyrës sesi mazhoranca dhe opozita kanë interpretuar dhe përdorur ligjin në varësi të interesave politike të momentit. Sipas Kumes, procedurat për ndërprerjen e mandatit të një kryebashkiaku janë të përcaktuara qartë në ligj, por në rastin e Tiranës ato nuk janë ndjekur siç duhet.

”Është një rast shumë i dukshëm i mosrespektimit të kërkesave të shtetit ligjor. Procedura është e përcaktuar në ligj, por nuk është zbatuar siç duhet. Është bërë sikur është zbatuar dhe kjo është bërë nga të dyja palët, mazhoranca dhe opozita, në varësi të asaj që u ka shërbyer politikisht”, thotë për ”Top Channel”.

Ai thekson se Këshilli Bashkiak nuk i dha mundësinë Veliajt për t’u dëgjuar gjatë procedurës, ndërsa Këshilli i Ministrave nuk iu referua dispozitave të nenit 115 të Kushtetutës. Nga ana tjetër, eksperti nënvizon se ligji për vetëqeverisjen vendore parashikon procedura të posaçme në rastet kur një kryebashkiak mungon për një periudhë të gjatë nga detyra. Sipas tij, mungesa për tre muaj radhazi përbën një situatë që mund të aktivizojë procedurat për ndërprerjen e mandatit dhe kjo pjesë e ligjit, sipas Kumes, nuk është rrëzuar nga Gjykata Kushtetuese.