Tjetër skandal me tekstet shkollore: “Muhamedi është biri i Zotit”

Në tekstin e sociologjisë për klasat e 11-ta janë vënë re pasaktësi në shpjegimin e fesë islame.

Konkretisht, në faqen 109 të librit tëSociologjisë, i hartuar nga Fatos Tarifa, Klementin Mile dhe Flora Gjoka, thuhet se Allahu është i vetmi Zot dhe Muhamedi është biri i tij.

Por sipas predikimeve islame, Muhamedi është i dërguari i Allahut.

Edhe në tekste të tjera të librave shkollorë janë konstatuar parregullsi. Pak kohë më parë në rrjetet sociale qarkulluan foto të shkëputura nga librat, kryesisht nga lënda e Leximit, ku flitet për nxitje të urrejtjes ndaj prindërve, apo për metoda se si mund të gënjehen mësuesit dhe prindërit.

“Shkumësi Magjik” një pjesë nga leximi i klasës së dytë, u mëson të vegjëlve se si të gënjejnë dhe të mos shkojnë në shkollë, duke tretur një shkumës në një gotë me ujë, i cili u ngre temperaturën.

Ndërkohë në një pjesë të shkëputur nga Edukimi për Karrierën e klasës së 10, jepet një situatë rasti për të cilët duhet të diskutojnë me një familje shqiptare që emigron në Athinë.

Babai ishte i alkoolizuar dhe në debat e sipër godet bashkëshorten në kokë, e cila vdes në spital. Babai përfundon në burg, ndërsa dy të vegjlit rriten nga gjyshërit e mamasë, të cilët u përçojnë urrejtjen ndaj babait.