Tragjedi në Shëngjin, mbyten dy të rinj. Tre të tjerë dërgohen në spital

Një tragjedi ka ndodhur këtë të mërkuë në zonën e Ranës së Hedhun në Shëngjin, ku pesë shokë që kishin hyrë në det janë përballur me dallgët e forta.

Dyshohet se të rinjtë janë marrë nga rrymat dhe dallgët e detit, ku dy prej tyre kanë humbur jetën, ndërsa tre të tjerë ndodhen në spital, fatmirësisht jashtë rrezikut për jetën. Sipas informacioneve paraprake, raportohet se të rinjtë nga Kosova i morën dallgët e krijuara nga deti në moment, kur dukej i qetë bregdeti.

Në zonën ku ndodhi tragjedia raportohet se nuk ka kulla vrojtimi dhe as flamuj të kuq në det, të cilët përdoren si sinjalizues që pushuesit të mos futen në det, kur ky i fundit ka dallgë ose është i trazuar. Në vendngjarje ndodhen shërbimet e emergjencës dhe forcat e policisë, që po punojnë për zbardhjen e plotë të rrethanave.

Në zonën e Ranës së Hedhun deti mbetet problematik nga dallgët e paparashikuara momentale.

Njoftim i policisë:

Rreth orës 16:30, shërbimet e Policisë kanë marrë njoftim se në zonën e Ranës së Hedhun, në Shëngjin, disa shtetas që ishin futur në det për t’u larë, si pasojë e dallgëve të shkaktuara nga era e fortë, ndodheshin në vështirësi dhe rrezikonin të mbyteshin.

Menjëherë pas marrjes së njoftimit, në adresën e dhënë kanë shkuar shërbimet e Policisë Kufitare, shërbimet e Drejtorisë Vendore të Policisë Lezhë, si dhe ato të emergjencës.

Falë reagimit të menjëhershëm të qytetarëve me Jet Ski, në bashkëpunim me shërbimet e Policisë, u bë e mundur nxjerrja nga deti e 5 shtetasve nga Kosova, të cilët u transportuan me urgjencë në Spitalin Rajonal Lezhë për marrjen e ndihmës mjekësore.

Sipas informacionit paraprak nga Urgjenca e Spitalit Rajonal Lezhë, 2 prej shtetasve kanë humbur jetën, ndërsa 3 shtetasit e tjerë po marrin ndihmë mjekësore.

Grupi hetimor, nën drejtimin e Prokurorisë, vijon veprimet për zbardhjen e plotë të rrethanave të ngjarjes.