Tragjedia që tronditi vendin, qytetarët e Durrësit dalin në protestë: Ku është drejtësia?

Këtë të mërkurë, banorët e Durrësit janë mbledhur në një marshim përkujtimor dhe protestues për dy të miturit që humbën jetën tragjikisht në aksidentin fatal të së dielës. Ngjarja e rëndë, e cila ka tronditur mbarë opinionin publik, ndodhi pasi Nikoll Radaçi drejtonte automjetin në gjendje të dehur, duke shkaktuar aksidentin fatal.

Marshimit i janë bashkuar familjarët e viktimave, të afërm, si dhe dhjetëra qytetarë të Durrësit, të cilët kanë zgjedhur të shprehin dhimbjen dhe zemërimin e tyre përmes kësaj proteste paqësore. Të pranishmit mbajnë në duar pankarta me mesazhe të forta, ku bie në sy thirrja: “Ku është drejtësia?”, duke kërkuar përgjegjësi dhe ndëshkim maksimal për autorin e dyshuar.

Qytetarët kërkojnë që institucionet përgjegjëse të reagojnë me vendosmëri, duke siguruar që raste të tilla të mos përsëriten dhe që drejtësia të vihet në vend për viktimat e pafajshme. Ndërkohë, protesta pritet të vijojë edhe në orët në vijim, si shenjë solidariteti dhe presioni qytetar për transparencë dhe llogaridhënie.