Rritja e çmimeve të karburanteve po rëndon gjithnjë e më shumë operatorët e transportit urban. Kryetari i Shoqatës së Transportit Urban, Dashnor Memaj, thotë se sektori po përballet me kosto të larta dhe ka kërkuar ndërhyrjen e institucioneve.
Sipas Memajt, kërkesat kryesore janë ulja e akcizës dhe dhënia e subvencioneve, pasi operatorët nuk janë kompensuar për rritjen e kostove. Ai theksoi se edhe gjatë muajve të verës çmimi i karburantit ka mbetur i lartë, duke ndikuar drejtpërdrejt në funksionimin e transportit publik.
Memaj paralajmëroi se nëse nuk do të ketë një reagim institucional, operatorët mund të mos kenë mundësi financiare për të nxjerrë të gjithë flotën në rrugë, duke sjellë reduktim të shërbimit.
Në këtë situatë, ai kërkoi mbështetje për sektorin, por edhe investime për rinovimin e flotës dhe përmirësimin e infrastrukturës, me qëllim ofrimin e një transporti publik më të mirë dhe më të qëndrueshëm.