Trump: Bisedimet Izrael–Liban do të zhvillohen të enjten

Donald Trump ka deklaruar se bisedimet mes udhëheqësve të Izraelit dhe Libanit pritet të zhvillohen të enjten, në një përpjekje për të ulur tensionet në rajon.

Në një postim në platformën Truth Social, Trump tha se administrata e tij po “përpiqet të krijojë pak hapësirë për të marrë frymë” mes dy vendeve, duke lënë të kuptohet për një hap drejt de-eskalimit të situatës.

Kjo deklaratë vjen në një moment kritik, pasi kryeministri izraelit Benjamin Netanyahu zhvilloi një mbledhje me kabinetin e sigurisë të mërkurën, ku sipas raportimeve është diskutuar mundësia e një marrëveshjeje armëpushimi me Libanin.

Situata në kufirin Izrael–Liban mbetet e tensionuar, kryesisht për shkak të pranisë së grupit militant Hezbollah, i cili mbështetet nga Irani. Ky grup ka qenë i përfshirë në përplasje të vazhdueshme me forcat izraelite.

Më herët, Hezbollah kishte sinjalizuar se një armëpushim mund të arrihet “së shpejti”, ndërsa një zyrtar i lartë amerikan është shprehur se Shtetet e Bashkuara nuk kanë kërkuar drejtpërdrejt një armëpushim, por do të mirëprisnin përfundimin e armiqësive në Liban.