Trump fton Putinin në samitin e G20-së

Në Asamblenë e Përgjithshme të OKB-së vazhdojnë përpjekjet për përfundimin e luftës së Rusisëkundër Ukrainës. Sipas deklaratave të ministrit të Jashtëm, Marco Rubio, qeveria amerikane e ka ftuar tani presidentin rus Vladimir Putin në samitin e G20, i cili do të zhvillohet në dhjetor në Miami.

Rubio e arsyetoi këtë vendim para gazetarëve në Nju-Jork duke thënë se, nëse dëshiron të zgjidhësh probleme, duhet të takohesh edhe me njerëz me të cilët nuk je dakord. Sipas tij pjesëmarrja e Putinit në samitin e G20 në Miami do të ishte një mundësi e mirë që ai të bisedonte jo vetëm me presidentin amerikan Donald Trump, por edhe me krerë të tjerë shtetesh dhe qeverish.

Armëpushim, apo jo?

Rubio u shpreh gjithashtu optimist se mund të ketë një ndërprerje të luftimeve. Pas një takimi me ministrin e Jashtëm rus, Sergej Lavrov, ai tha se Ukraina dhe Rusia janë të interesuara për një armëpushim të kufizuar.

Sipas Rubios të dyja palët kanë sinjalizuar interes për një marrëveshje që mund të përfshijë ndalimin e sulmeve ndaj transporteve të drithërave dhe ndaj objekteve energjetike. Ai theksoi se arritja e një marrëveshjeje të pjesshme në këtë konflikt nuk është e lehtë, por se përpjekja ia vlen edhe nëse ajo nuk i jep fund plotësisht luftës.

Megjithatë pak më vonë Lavrovi i zbehu këto pritshmëri. Në Këshillin e Sigurimit të OKB-së ai hodhi poshtë sërish çdo ide për armëpushim. Sipas tij një pauzë të tillë e dëshiron vetëm Evropa, në mënyrë që gjatë kësaj kohe ta furnizojë Ukrainën me më shumë armë.

Lavrovi deklaroi se Moska, ashtu siç ka thënë edhe presidenti Vladimir Putin, po kërkon një zgjidhje gjithëpërfshirëse për t’i dhënë fund konfliktit.

Ukraina e gatshme për armëpushime të pjesshme

Ministri i Jashtëm ukrainas, Andrij Sybiha, theksoi në kundërpërgjigjen e tij se Kievi është i gatshëm për një armëpushim të menjëhershëm dhe të plotë, pa kushte, me kusht që edhe Moska ta respektojë atë.

Ai shtoi se Ukraina është gjithashtu e gatshme për armëpushime të pjesshme, që do të përfshinin ndalimin e sulmeve ndaj objekteve energjetike ose ndaj eksporteve të drithërave.

Presidenti ukrainas Volodymyr Zelenskyj, në fjalimin e tij para Asamblesë së Përgjithshme të OKB-së, e akuzoi presidentin rus Vladimir Putin se nuk dëshiron paqe.

SHBA-ja po përpiqet prej kohësh të arrijë një fund të luftës së agresionit rus, e cila vazhdon prej më shumë se katër vjet e gjysmë. Megjithatë deri tani raundet e bisedimeve nuk kanë sjellë ndonjë përparim vendimtar./dw/