The Independent: Zonat erogjene më pak të njohura dhe si t’i gjeni ato

Në një material të zgjeruar nga The Independent, i është rikthyer një teme sa e shtjelluar aq edhe e mbetur tabu: zonat erogjene më pak të njohura dhe mundësia e gjithsecilit për t’i zbuluar ato.

Fjala “erogjen” vjen nga greqishtja eros, që do të thotë dashuri, dhe nga anglishtja genous, që do të thotë prodhim. Një zonë erogjene është një pjesë e trupit me ndjeshmëri të shtuar, e cila, kur stimulohet, mund të shkaktojë një reagim seksual – nga relaksimi, mendimet e fantazive seksuale, deri te ngacmimi seksual dhe orgazma.

Janë bërë shumë studime mbi numrin e madh të zonave erogjene që ekzistojnë në trupin tonë – përfshirë edhe momentin ikonik në serialin “Friends” ku Monica i mëson Chandlerit për shtatë zonat erogjene të gruas. Megjithatë, numri i tyre mund të jetë më i madh.

Trupi i njeriut është tepër i ndjeshëm ndaj prekjes dhe përjetimi i kënaqësisë seksuale është i ndryshëm për secilin. Ajo që për dikë është erotike, për dikë tjetër mund të jetë e pakëndshme. Kur përmenden zonat erogjene, mendja na shkon menjëherë te pjesët më të njohura të trupit: gjinjtë, thithat, klitorisi, pika G dhe penisi. Këto zona janë më të pasura me mbaresa nervore dhe reagojnë me intensitet ndaj prekjes. Organet gjenitale, në veçanti, i nënshtrohen vazokongjestionit – një proces që rrit qarkullimin e gjakut dhe ndjeshmërinë.

Megjithatë, ka edhe zona të tjera, më pak të njohura dhe më pak të hulumtuara, që mund të jenë po aq erogjene në varësi të mënyrës së prekjes: si qepallat, parakrahët, barku, koka. Këto mund të shkaktojnë përgjigje seksuale kur stimulohet në mënyrë të kujdesshme dhe sensuale.

Eksplorimi i trupit tënd dhe të partnerit është një mënyrë jo vetëm kënaqësuese, por edhe zbuluese për të kuptuar çfarë të ngjall eksitim dhe çfarë nuk të përkon. Kjo njohje është e rëndësishme veçanërisht për ata që përjetojnë ulje të ndjeshmërisë seksuale si pasojë e sëmundjes, lëndimit, paaftësisë ose ndërhyrjeve kirurgjikale. E njëjta vlen edhe për personat transgjinorë ose ata që kanë kryer ndërhyrje estetike si zmadhimi i gjoksit.

Zonat erogjene më pak të njohura

Truri

Edhe pse zakonisht nuk mendohet si zonë erogjene, truri është organi më i madh seksual. Ai bën lidhjen mes ndjesive fizike dhe stimulimit vizual, duke ndikuar drejtpërdrejt në mënyrën si përjetohet kënaqësia. Një studim nga Universiteti i Göteborgut (Akademia Sahlgrenska, 2011) tregoi se truri reagon fuqishëm jo vetëm ndaj përkëdheljes, por edhe kur vëzhgon dikë tjetër që përkëdhelet.

Kush të prek

Përjetimi i prekjes ndryshon në varësi të asaj se kush të prek dhe si. Një frymëmarrje e lehtë pas qafës, një puthje në dorë apo një përkëdhelje në gju, mund të jenë shumë më ngacmuese kur vijnë nga dikush për të cilin ndjen dëshirë. Një eksperiment i kryer nga Instituti i Teknologjisë në Kaliforni tregoi se perceptimi i burimit të prekjes ndikon fuqishëm në përjetimin seksual – pavarësisht se prekja në fakt ishte identike në të dy rastet.

Sytë

Edhe pse nuk konsiderohen tradicionalisht si zonë erogjene, sytë mund të ngjallin ndjesi të thella erotike. Një vështrim i ngulur, një kontakt i zgjatur sy më sy, mund të krijojnë ndjesi nga më të fortat: dridhje, emocion, ethe. Bebëzat e zmadhuara janë shenjë e qartë e ngacmimit, duke rritur tërheqjen seksuale.

Buzët

Puthja është një formë komunikimi sensual që përfshin miliona mbaresa nervore. Buzët janë një ndër zonat më të ndjeshme të trupit – madje 100 herë më të ndjeshme se majat e gishtave. Ato janë porta e parë drejt eksitimit seksual. Puthjet mund të jenë aq të forta sa të shkaktojnë orgazmë pa kontakt gjenital. Edhe pjesë të tjera si qepallat, vetullat, tëmthat, shpatullat, flokët dhe duart mund të jenë shumë stimuluese.

Qafa, sidomos pjesa e pasme dhe zona e klavikulës, është jashtëzakonisht e ndjeshme tek të dy gjinitë. Përkëdhelja apo lëpirja e këtyre zonave mund të jetë shumë ngacmuese dhe shpeshherë nënvlerësohet.

Për ata që kanë dëmtime të palcës kurrizore, kënaqësia seksuale nuk humbet, përkundrazi, shpesh zhvendoset në zona të tjera të trupit – lëkura mbi zonën e dëmtuar mund të bëhet më e ndjeshme dhe të ketë përgjigje erotike të shtuar.

Orgazmat më pak të njohura

Krahas orgazmës klitorale dhe të pikës G, ekziston edhe ajo cervikale – e përmendur shpesh në seksin tantrik. Kjo është një përvojë e thellë, e cila ndjehet si valë e ngrohtë që përshkon të gjithë trupin dhe mund të zgjasë për orë të tëra. Nuk është aq e përqendruar sa ajo klitorale, por më e thellë dhe më shpirtërore. Mund të arrihet përmes penetrimit të thellë apo përdorimit të lodrave më të mëdha seksuale.

Hartimi i trupit

“Harta e trupit” është një teknikë vetë-eksplorimi që mund të jetë veçanërisht ndihmuese për ata që përjetojnë ndjeshmëri të reduktuar për shkak të sëmundjeve si skleroza e shumëfishtë. Përmes prekjes së kujdesshme të të gjitha pjesëve të trupit, zbulohet se cilat zona japin kënaqësi – edhe nëse nuk janë tradicionalisht “erogjene”.

Përgatiti: Albert Vataj