Protesta që po zhvillohet prej 86 ditësh në Tiranë ka tërhequr edhe vëmendjen e turistëve të huaj. Ndërsa debati publik është përqendruar te ndikimi i protestave në turizëm, një turiste nga Gjermania ka zgjedhur t’u drejtohet drejtpërdrejt protestuesve dhe t’u shprehë mbështetjen e saj.
Në fjalën e mbajtur para protestuesve, ajo tregoi se demonstratat i kishte ndjekur nga Berlini dhe se prej kohësh e kishte ndjekur situatën në Shqipëri. “Kam ardhur këtu për 20 vite në vendin tuaj të bukur. Ne e duam shumë vendin tuaj. Jeni të mirë dhe miqësorë dhe e meritoni demokracinë”, u shpreh turistja.
Ajo tha se pamjet e protestave i kishin krijuar përshtypjen e një populli që nuk heq dorë nga idealet e tij. “Po ndiqja demonstratat tuaja nga Berlini, Gjermani, dhe mendoja se këta njerëz kanë fuqinë të luftojnë për idealet e tyre”, tha ajo.
Në fund, mesazhi i saj për protestuesit ishte i drejtpërdrejtë: të vazhdojnë qëndresën dhe të luftojnë për demokracinë. “Luftoni dhe bëhuni demokracia”, u shpreh turistja gjermane.