Prokuroria e Fierit ka kërkuar dënim të përjetshëm për tre personat që qëlluan pronarin e një “Exhange” dhe vranë një person tjetër në Fier.
Procesi gjyqësor drejt tyre është mbyllur dhe organi i akuzës në deklarimet e fundi ka kërkuar që të pandehurit Lulëzim Demiraj, Zini Fyraj dhe Dashamir Gergali të dënohen me burgim të përjetshëm. Ata akuzohen për plagosjen e Gëzim Hoxhës dhe vrasjen e Agur Vrenozit më 2 mars 2018.
Prokuroria pretendon se ka arritur të vërtetojë se fillimisht 3 personat kanë hyrë për të grabitur pikën e këmbimit valutor të Hoxhës, por janë përleshur me të dhe Vrenozin, i cili i ka ardhur në ndihmë Gëzim Hoxhës.
Detajet e ngjarjes
Ngjarja ndodhi më 2 mars 2018 rreth orës 11:00 dhe përfundoi me plagosjen e pronarit të këmbimit valutor dhe vdekjen e mikut të tij, i cili tentoi të ndalonte grabitësit. Ndërsa të tre autorët u arrestuan pas ndjekjes nga policia. Dy prej autorëve të maskuar dhe të armatosur janë futur brenda në pikën e këmbimit duke u përleshur me pronarin, ndërsa i treti i priste jashtë me makinë për t’u larguar. Vrenozi pronari i godinës ku dhe ndodhi grabitja, kur pa që miku i tij kishte rënë pre e këtij sulmi mori një karrige dhe filloi të përleshej me grabitësit, duke tentuar t’i ndalonte. Gjatë përleshjes, njëri nga grabitësit, pikërisht Demiraj qëlloi në kokë, me armë zjarri automatik ndaj 54-vjeçarit dhe pronarit të këmbimit valutor. Pas përleshjes dhe qëllimit me armë zjarri, ku mbeti i vrarë Agur Vrenozi, autorët morën çantën me para dhe u larguan me makinë me shpejtësi nga vendi i ngjarjes në drejtim të fshatrave të Fierit. Ndërkohë që arratia e tyre nuk ka zgjatur për shumë minuta. Pasi pikasën që po ndiqeshin nga policia ata braktisën mjetin dhe u larguan me vrap në këmbë, por 30 minuta pas grabitjes fillimisht është kapur Zini Fyraj pranë fshatit Baltëz. 37-vjeçari, i cili kishte dhe çantën me para u hodh në lumë, por nuk i ka shpëtuar arrestimit. Ndërkohë që rreth orës 12:30 minuta është arrestuar edhe autori i dytë i grabitjes, Lulëzim Demiraj, në vendin e quajtur “Ura e Baltëzës”, ky i fundit është dhe personi i cili qëlloi ndaj dy personave në momentin e grabitjes. Ndërkohë që autori i tretë, 41-vjeçari Dashamir Gergali është arrestuar në një banesë në fshatin Baltëz. Policia i sekuestroi edhe çantën me para, që grabitën në pikën e këmbimit valutor, në të ndodheshin rreth 10 milionë lekë dhe 6000 euro.
Seancat gjyqësore
Pas arrestimit, autori i dyshuar për vrasjen e Agur Vrenozit teksa futej në sallë të gjyqit nuk i ka mbajtur dot lotët dhe ka deklaruar para hetuesve se nuk ka qenë ai që ka qëlluar me armë. Lulzim Demiraj ka thënë për hetuesit gjatë marrjes në pyetje se, bashkë me dy të arrestuarit e tjerë, Zini Fyraj, 37 vjeç banues në Sevaster, Vlorë dhe Dashamir Gergali, 41 vjeç banues në Zhupar, Fier, kishin për qëllim vetëm grabitjen e pikës së këmbimit valutor për shkak të gjendjes ekonomike dhe situata u doli nga kontrolli. “Nuk e kam qëlluar unë. Nuk mbaj mend se si ndodhi. Unë di që gjërat ndodhën shpejt. Ne nuk kemi shkuar atje me qëllim të lëndonim ndonjë. Situata erdhi ashtu dhe nuk e mbaj mend se si ka ndodhur”, mësohet të ketë thënë ndër të tjera Lulëzim Demiraj, i cili është shprehur i penduar në sytë e hetuesve. Edhe Zini Fyraj, i cili bashkë me 43- vjeçarin hyri në pikën “Exchange”, ka deklaruar se është detyruar të kryejë grabitje, pasi gjendet në vështirësi ekonomike. 37-vjeçari nga Vlora rezulton se është arrestuar dhe në korrik të vitit 2017 për vjedhje, por në rrethana krejt të paqarta ka rifituar lirinë. Dalja e tij nga burgu erdhi për shkak se nuk faktohej me prova përfshirja e tij në një vjedhje të ndodhur më 30 qershor në lagjen “24 Maji” në Vlorë, ku nën kërcënimin e armës së zjarrit, disa persona mes të cilëve dhe Fyraj, i kanë vjedhur 29-vjeçarit A.B. 4000 euro.