Universiteti Bujqësor, s’ka studentë

Paçka nevojës që ka tregu bujqësor shqiptar, interesi i të rinjve për tu arsimuar në këtë fushë është gjithmonë e më i pakët. Rektori i ri i Universitetit bujqësor të Tiranës, Fatbardh Sallaku u bën thirrje jo vetëm maturantëve për tu regjistruar në këtë institucion arsimor, por edhe qeverisë për një strategji nxitëse në mënyrë që universiteti të mos rrezikojë mbylljen e disa degëve.

”Kjo është një humbje për shoqërinë shqiptare, për organizmat qeveritare që mund të mbeten pa profesione tradicionale 70 vjecare sic është profesioni i izoteknikut, agronomit , inxhinierit të pyjeve të cilët janë vërtet jetike për shoqërinë shqiptare. Kjo është një thirrje që shkon jo vetëm për gjimnazistët që të kthejnë sytë nga këto degë por së pari shkon për qeverinë shqiptare për të parë gjithë mekanizmat ndihmues për ti ruajtur dhe për të stimuluar brezin e ri të ndjek këto degë. Sepse unë mendoj që në Shqipëri fokusi kryesor për zhvillimin e ekonomisë është bujqësia dhe turizmi”,- thotë Sallaku.

Krahasuar me vitet e shkuara, rënia e regjistrimeve të studentëve në disa degë të universitetit bujqësor është e dukshme. ”E para është mesatarja e lartë. E dyta rënia e lindshmërisë që ka prekur gjithë universitetet. E treta emigracioni i brezit të ri dhe e katërta e më e rëndësishmja por pa sens per mua është non sens është interesi që gjimnazistët shfaqin për këto degë tradicionale e jetike për ekonominë”,- tha për TCH.