Universiteti i Elbasanit “Aleksandër Xhuvani” vendos studentin më pranë profesionit, “Pakti UNIEL për Praktikën dhe Punësimin”

Universiteti i Elbasanit “Aleksandër Xhuvani” nis vitin akademik 2026–2027 me një orientim të ri, që synon të forcojë lidhjen e studentëve me profesionin dhe tregun e punës. Në një konferencë për shtyp, rektorja Prof. Dr. Elvira Fetahu prezantoi “Paktin UNIEL për Praktikën dhe Punësimin”, si një nga drejtimet e rëndësishme të zhvillimit të universitetit.

Pakti synon që studentët të mos e njohin profesionin vetëm pas përfundimit të studimeve, por ta provojnë dhe ta ndërtojnë lidhjen me të që gjatë viteve universitare, përmes praktikave, mentorimit, projekteve reale dhe bashkëpunimit me institucionet dhe sipërmarrjen.

Universiteti ka ngritur tashmë një Bord Këshillimor të Biznesit, duke krijuar një urë më të drejtpërdrejtë mes akademisë dhe botës profesionale. Sipas rektores Fetahu, ky bashkëpunim do të zgjerohet në çdo program studimi, duke iu përshtatur natyrës së profesionit.

“Për studentin e Mësuesisë partner është shkolla, për Infermierinë është spitali, për Teknologjinë e Informacionit janë kompanitë dhe laboratorët, për Ekonominë janë bizneset, bankat dhe institucionet”, u shpreh Fetahu.

Synimi i Universitetit është të kalojë nga modeli tradicional universitet–auditor drejt një universiteti të hapur, ku akademia, biznesi, institucionet dhe komuniteti bashkëpunojnë për formimin profesional të studentëve.

Në këtë drejtim, një rol të rëndësishëm merr edhe kërkimi shkencor. Universiteti i Elbasanit disponon një laborator kërkimor të akredituar deri në vitin 2030 në zonën e ish-Kombinatit Metalurgjik, i cili punon edhe me nevojat reale të industrisë. Ky model synohet të zgjerohet, duke afruar studentin me kërkimin shkencor dhe tregun e punës.

“Duam që Universiteti të mos jetë vetëm vendi ku transmetohet dije, por edhe vendi ku prodhohet dije”, theksoi rektorja.

Ky orientim i ri shoqërohet edhe me rezultate pozitive në regjistrimet për vitin akademik 2026–2027. Në raundin e parë, programet më të preferuara kanë qenë Infermieri e Përgjithshme, Edukim Fizik dhe Sporte, Financë–Kontabilitet, Teknologjitë e Informacionit dhe Informatikë Ekonomike.

Në fokus mbetet edhe ndërkombëtarizimi, zgjerimi i bashkëpunimeve universitare dhe forcimi i kërkimit shkencor, ndërsa Universiteti synon që studentëve t’u ofrojë jo vetëm dije akademike, por edhe eksperiencë, kompetenca dhe mundësi konkrete për të ndërtuar të ardhmen profesionale.

Për maturantët që janë ende në fazën e dytë të aplikimeve, mesazhi i rektores Fetahu është i qartë, zgjedhja e universitetit duhet të lidhet me profesionin dhe të ardhmen që duan të ndërtojnë.

“Ky është orientimi ynë për vitin akademik 2026–2027, nga auditori te profesioni dhe nga diploma te kompetenca.”