Ushqimet shtrenjtohen në botë, FAO jep alarmin: Çfarë pritet në Shqipëri

Çmimet e ushqimeve në tregjet ndërkombëtare shënuan rritje gjatë korrikut, duke arritur në 131.1 pikë, sipas të dhënave të FAO-s. Krahasuar me qershorin, indeksi u rrit me 0.8 pikë, i ndikuar kryesisht nga shtrenjtimi i drithërave, zarzavateve dhe produkteve të qumështit.

Ekspertët vlerësojnë se kjo tendencë mund të ndihet edhe në Shqipëri, sidomos për produktet ku vendi ka varësi të lartë nga importi. Shqetësimet për prodhimin bujqësor, rendimentet më të ulëta dhe tensionet gjeopolitike kanë ndikuar në rritjen e çmimeve në tregjet ndërkombëtare.

Sipas Theodhor Kristulit nga Unioni Agroushqimor Shqiptar, rritja e çmimeve të qumështit dhe nënprodukteve në vendet nga ku Shqipëria importon pritet të reflektohet edhe në tregun vendas. Megjithatë, ai thekson se tregtarët po kërkojnë tregje të reja furnizimi për të shmangur një ndikim më të madh.

Ndërkohë, çmimet e mishit dhe nënprodukteve të tij shënuan një ulje të lehtë gjatë korrikut. Për të frenuar shtrenjtimin e mëtejshëm dhe rrezikun e një vale të re inflacioni, ekspertët kërkojnë ndërhyrjen e qeverisë, përfshirë lehtësimin e TVSH-së për disa produkte të importuara.