Vala e të ftohtit godet Ballkanin, temperaturat bien deri në 15 gradë

Një valë e fortë e të ftohtit pritet të përfshijë Evropën Lindore dhe Ballkanin gjatë kësaj jave, duke sjellë rënie të ndjeshme të temperaturave. Sipas Severe Weather Europe, edhe Shqipëria do të ndikohet nga masa ajrore polare që po zbret nga veriu.

Në zonat më të prekura, temperaturat mund të bien me 10 deri në 15 gradë Celsius, ndërsa në Ballkanin qendror priten vlera 6 deri në 10 gradë nën normalen për fundin e shtatorit.

Serbia, Bosnja, Rumania dhe Bullgaria pritet të përjetojnë rënien më të madhe të temperaturave, ndërsa i ftohti do të shtrihet edhe drejt Greqisë dhe Turqisë. Në zonat malore mund të shfaqen reshjet e para të borës, ndërsa në disa lugina priten edhe ngricat e para të sezonit.

Meteorologët parashikojnë që vala e të ftohtit të jetë e përkohshme, me temperatura që pritet të rriten gradualisht në fund të muajit.