Vatikani njoftim për gjendjen shëndetësore të Papa Françeskut

Vatikani ka publikuar sot buletinin mjekësor mbi gjendjen shëndetësore të Atit të Shenjtë, duke bërë me dije se në 24 orët e fundit ka pasur një përmirësim të lehtë të mëtejshëm.

Sipas raportit të përcjellë nga Konferenca Ipeshkvore, pamjaftueshmëria e veshkave, e evidentuar më parë, nuk përbën më një problem. Ndërkohë, ekzaminimi me skaner i kraharorit ka treguar një evolucion normal të gjendjes së mushkërive, ndërsa analizat e gjakut konfirmojnë përmirësimin e vazhdueshëm.

Ati i Shenjtë vijon terapinë me oksigjen me flukse të larta dhe nuk ka shfaqur kriza frymëmarrjeje. Gjithashtu, ai po ndjek fizioterapinë për funksionimin e frymëmarrjes.

Pavarësisht përmirësimeve, mjekët theksojnë se është ende herët për të dhënë një vlerësim të saktë mbi ecurinë e mëtejshme të sëmundjes. Gjatë paradites, Ati i Shenjtë ka marrë Kungimin, ndërsa pasdite është angazhuar në punë.