Veliaj: Mbajmë premtimin për 12 kënde lojërash brenda vitit

Fëmijët e Njësisë Administrative nr. 7 në kryeqytet do të kenë shumë shpejt hapësirën e tyre të argëtimit. Bashkia e Tiranës, në përmbushje të premtimit për të ndërtuar 12 kënde lojërash, ka nisur punën për ndërtimin e këndit të tetë të lojërave për fëmijë dhe ambiente sportive për më të rriturit në rrugën “Kongresi i Lushnjes”.

Fillimi i punimeve për këto hapësira të reja çlodhëse për banorët e zonës u inspektua nga kryetari i Bashkisë së Tiranës, Erion Veliaj, i cili theksoi se kjo është një tjetër dëshmi e vendosmërisë për të punuar për të fëmijët.

Veliaj tha se fakti që gjatë këtij viti të parë fokusi ka qenë i gjithi te fëmijët, tregon edhe një herë se punët në Tiranë nuk bëhen për efekte elektorale, por për t’i shërbyer gjeneratës tjetër, e cila sot nuk është e angazhuar në politikë. Kryetari i Bashkisë së Tiranës shtoi se deri në fund të këtij viti të 12 këndet e lodrave nëpër lagjet e Tiranës do të jenë gati për fëmijët, kjo edhe si një mënyrë që ata të rriten të shëndetshëm.