Veliaj: Te Liqeni, 2050 pemë të mbjella dhe 400 m2 sipërfaqe bari

Kryetari i Bashkisë së Tiranës, Erion Veliaj ka postuar në rrjetin social Twitter një grafikë me punimet e kryera deri tani nga kjo bashki  në Parkun e Liqenit Artificial.

Kështu, nga marrja e postit në gusht 2015 e deri më 16 shkurt, sipas Veliajt janë mbjellë 2050 pemë të reja, 400 metra katrorë sipërfaqe bari, janë pastruar 200.000 metra katrorë me ferra e shkurre si dhe janë pastruar 4000 metër kub mbeturina.

Veliaj thekson gjithashtu se ky projekt ka në fokus vetëm një vend argëtimi për fëmijët dhe se 100 herë do të zgjidhte anën e tyre.

Kryebashkiaku në Twitter po ashtu thekson se ai nuk do të sprapset në misionin e tij për t’i dhënë Tiranës frymëmarrje pavarësisht baltës që mund të hidhet në drejtim të tij.

“Kjo puna ime s’ta kursen baltën, por ka dhe momente si ky që të kujtojnë se ia vlen çdo betejë”, shkruan Veliaj në foton me nxënësit e shkollës ‘Edit Durham’.