Vëllezërit Hajri në kërkim dhe “perandoria” e tyre në Shijak

Dy vëllezerit Hajri nga Shijaku janë shpallur në  kërkim ndërkombetar një ditë pasi policia goditi organizatën e drogës me 16 të arrestuar, që ata drejtonin. Në Shijak aty kishin ngritur bizneset, ku askush nuk pranonte të fliste për Altin e Emiljano Hajrin.

Vetëm 20 kilometra nga Durrësi ndodhet “perandoria” e bizneseve të dy vëllezërve Altin dhe Emiljano Hajri, të shpallur në kërkim ndërkombëtar.

Të etiketuar si krerët e organizatës kriminale te trafikut ndërkombëtar të drogës, dy vëllezërit Hajri jetojnë mes luksit në Pjezës të Shijakut, aty ku dhe kanë ngritur biznese të shumta.

Një pasuri përrallore e familjes Hajri ne Shijak. Përllogariten në 10 milion euro investimi prej vëllezërve në vendlindjen e tyre.

Kompleksi është ndërtuar dhe administrohet prej tyre.

Por nuk është i vetmi biznes.

Vëllezërit Hajri, rezultojnë pronarë edhe të një servisi makinash. Ashtu edhe të një pike karburanti i ngritur pikërisht në këtë zonë.

Edhe kjo vilë luksoze dykatëshe, është në pronësi të vëllezërve.

E gjithë kjo pasuri zotërohet nga Altin dhe Emiljano Hajri, të cilët dyshohet se u ngritën me paratë e përfituara nga aktiviteti i tyre kriminal.

Vëllezërit Hajri u shpallën në kërkim ndërkombëtar, në kuadër të operacionit “Enigma” zhvilluar mes dy shteteve Itali-Shqipëri.

Ata akuzohen pjesë e një organizate kriminale në drejtim të trafikimit të lëndëve narkotike, e cila drejtohej prej tyre.