Vetëvrasja e fermerit, PD: Qeveria braktisi subvencionet dhe favorizoi oligarkët

Aktualitet E Mërkurë, 1 Shtator 2021 21:20

Për vetëvrasjen e fermerit në Roskoves, PD-ja bën fajore qeverinë. Deputeti i Fierit, Enkelejd Alibeaj thotë se selia blu ka denoncuar braktisjen e skemës së subvencioneve për fermerët, duke favorizuar 2-3 oligarkë importues që sjellin nga jashtë çdo produkt që fare mirë mund të ishte vendas.

Postimi i plotë

Një fermer i ka dhënë fund jetës në Roskovec, sepse prodhimi i serave të tij shitej me çmim shumë të ulët, dhe kësisoj, nuk arrinte të nxirrte fitime të mjaftueshme për të paguar kredinë. PD e ka denoncuar me forcë braktisjen e skemës së subvencioneve për fermerët, duke favorizuar 2-3 oligarkë importues që sjellin nga jashtë çdo produkt që fare mirë mund të ishte vendas.

Fermerët e kanë të pamundur të paguajnë këstet e kredisë çdo muaj, pasi prodhimet e tyre për shkak të rënies së konsumit dhe konkurrencës së pandershme që u bëhet me produkte importi, në shumicën e rasteve nuk shiten.

Fatëkeqësi të tilla janë një këmbanë alarmi për situatën në të cilën ndodhet sot ekonomia dhe bujqësia shqiptare. Në këtë ditë të vështirë, ne ndajmë dhimbjen me familjen e të ndjerit.

Zëri ynë në mbështetje të fermerëve ka qenë përherë i fortë, me propozime konkrete në mbështetje të njerëzve të punës që sakrifikojnë cdo gjë për të punuar ndershmërisht dhe për të dhënë kontributin e tyre në shoqërinë tonë. Zëri ynë në mbështetje të fermerëve do të jetë edhe më i fortë, që këto tragjedi të mos ndodhin më!

ETIKETA Enkelejd Alibeaj

SHKARKO APP

iPhone

Android

Më shumë lajme të fundit