Vetëvrasja e Bilbil Hasanit në burgun 313 në Tiranë, do të jetë objekt i një hetimi. Prokuroria e Tiranës thotë se procedimi është regjistruar për veprën penale të shkaktimit të vetëvrasjes. Neni 99 i kodit penal thotë se personi përgjegjës nëse vërtetohet se ka kryer shkelje dënohet me burg nga tre deri në 7 vite.
Prokuroria pritet të shqyrtojë procedurën e ndjekur nga punonjësit dhe drejtuesit e burgut për të verifikuar nëse mund të shmangej kjo ngjarje e rëndë. Nëse faktohet se punonjës të burgut nuk kanë respektuar protokollin në raste të tilla ata mund të hetohen edhe për shpërdorim detyre. Për ngjarjen e rëndë, reagoi edhe Inspektori i Lartë i Drejtësisë, Artur Metani, i cili pasi thotë se “u njoh nga mediat me lajmin e vetëvarjes së 43 vjecarit, e po ashtu edhe me pretendimin se i ndjeri po qëndronte me masë sigurie në burg, për shkak se kishte vjedhur 15 mijë lekë të vjetra”.
Vëllai i viktimës, Rajmond Hasani thotë se ai ishte me kartelë shëndetësore. ”Në polici nuk kemi dijeni ta ketë kallëzuar dikush. Ai është arrestuar para Vitit të Ri. Vëllai im ka qenë me kartelë mjekësore sa i përket shëndetit, prej 18 vitesh. Nuk ka qenë institucioni përkatës për ta mbajtur në burg. Është paraqitur në Gjykatë me kartelën shëndetësore, por nuk është marrë në konsideratë. Është shumë e padrejtë sepse ka qenë me mjekim sa i përket shëndetit mendor, dhe ai nuk duhet të ishte mes të gjithë kriminelëve”.
Fakti që ishte në burgun 313 ka ndikuar në vetëvrasje?
Kjo është arsyeja sipas meje, prej 18 vitesh nuk ka dhënë shenja. Nusja e tij në 8 të mëngjesit ka qenë e përgatitur për ta takuar dhe aty ka marrë njoftimin. Nuk ka qenë në dijeni as avokati për vetëvrasjen. Ka shfaqur shqetësime, mendoj se nga pjesa e izolimit dhe nga institucioni ku ai është mbajtur i burgosur, nuk duhet të ishte aty. Ngjarja ka ndodhur natën rreth orë 2 apo 3, ne jemi të informuar nga njerëzit. Avokati e ka marrë vesh lajmin dje në orën 12:00 nëpërmjet mediave. Bilbili ka qenë në emigracion që i vogël dhe për shkak të jetës së vështirë kaloi në depresion. Këtu ishte me kemp, herë pas here shkonte në Greqi, kishte edhe nusen në punë. Banesa është e tyrë, por janë në borxh sepse e kanë ndërtuar me borxhe.
Kush e detyroi Bilbilin drejt vetëvrasjes?
Fajtore sipas meje është Gjykata dhe Institucioni i Burgut që nuk ka kryer detyrën siç duhet. Ky rast na ka shkatërruar, dua që të ndiqet çështja dhe të kryhen hetime nga momenti i arrestimit, duke përfshirë edhe Gjykatën për vendimin masës arrest me burg për një të sëmurë mendor.
Dinamika e vjedhjes së 15 mijë lekëve
Bilbil Hasani i cili u gjet i vetëvrarë në qelinë e paraburgimit tek 313, ishte arrestuar më 9 dhjetor 2019, për një vjedhje të ndodhur në autobusin e linjës së stacionit të trenit. 43-vjeçari u vu në pranga pasi një shtetas A.D e akuzoi për vjedhjen e portofolit. Nga rrëfimi i tij, qytetari po shkonte tek Tregu Industrial së bashku me bashkëshorten dhe në momentin kur urbani kishte qëndruar tek stacioni përballë restorat “Durrësit”, Hasani ka futur dorën në xhepin e Dedës dhe ka vjedhur portofolin, brenda të cilit kishte 15.200 lekë dhe dokumenta të tjera. Pasi ka konstatuar këtë fakt, A.D është vënë në ndjekje të autorit, i cili në vrap e sipër e ka hedhur portofolin dhe pak më tutje Hasani u kap në flagrancë nga qytetari, i cili ka njoftuar policinë dhe në ndihmë i ka ardhur edhe një shtetas tjetër që e kanë mbajtur 43-vjeçarin derisa ka ardhur policia. Prokuroria e Tiranës kishte kërkuar caktimin e masës së sigurisë ”arrest me burg”, masë që ishte pranuar edhe nga gjyqtari Ardian Kalia. Pas zhvillimit të seancës paraprake ishte vendosur kalimi i çështjes për gjykim.