VIDEO/ Arben Kola vijon thirrjet e forta ndaj Policisë: Mos provokoni rininë në protestë

I prezantuar si një nga organizatorët kryesorë të protestës qytetare përballë Kryeministrisë, Arben Kola ka vijuar thirrjet e tij publike drejtuar Policisë së Shtetit, duke kërkuar që të shmangen provokimet ndaj të rinjve që marrin pjesë në tubime.

Gjatë fjalës së mbajtur para protestuesve tek sheshi ”Skëndërbej”, Kola u bëri apel forcave të rendit të tregojnë përmbajtje dhe profesionalizëm, duke theksuar se rinia e pranishme në protestë nuk duhet të përballet me veprime që mund të përshkallëzojnë situatën. Ai u kërkoi gjithashtu pjesëmarrësve të ruajnë qetësinë dhe të mos bien pre e provokimeve.

“Mos provokoni rininë në protestë”, ishte mesazhi kryesor i Kolës, i cili theksoi se protesta synon të mbetet paqësore dhe të përqendrohet te kërkesat e qytetarëve. Sipas tij, çdo përplasje mes protestuesve dhe policisë do të dëmtonte kauzën e ngritur nga organizatorët. Deklaratat e tij vijnë në një moment kur protestat kanë tërhequr një pjesëmarrje të konsiderueshme të të rinjve dhe kur organizatorët kanë bërë vazhdimisht thirrje për shmangien e incidenteve gjatë tubimeve.

”Nuk do të lejojmë përplasje, mos bini pre e provokimet. Rama, Berisha, e dinë mirë që populli me urrejtjen që ka është gati t’i tërheqë zvarrë e t’i çojë në fund të detit. Por ne duam që me ata të merret drejtësia. Negociata me hajdutë nuk ka. Nuk ka zgjedhje të parakohshme, atë e vendos sovrani, që sot jeni ju dhe jo ata nëpër studio. Ftojmë bizneset të na bashkohen dhe të mbyllin qepenët”, tha ai.

Sakaq Policia e Tiranës ka proceduar penalisht 27 protestues në lidhje me tubimin e ditës së 19-të në kryeqytet. ”Këta shtetas kanë shkaktuar pengim të qarkullimit të mjeteve të transportit, si dhe shqetësim për rendin dhe qetësinë publike, duke orientuar qytetarët pjesëmarrës në tubim, për të lëvizur në akse të shumta të kryeqytetit, në tejkalim të orarit dhe perimetrit të lëvizjes të njoftuar zyrtarisht. Gjithashtu, është sekuestruar dhe 1 automjet.

Vijon puna për identifikimin dhe procedimin e shtetasve të tjerë, përgjegjës për veprime të kundërligjshme gjatë tubimit. Materialet procedurale do t’i referohen Prokurorisë së Tiranës, për veprime të metejshme. Policia e Tiranës apelon për organizatorët e tubimit dhe pjesëmarrësit në të, që të respektojnë orarin dhe itinerarin e njoftuar për zhvillimin e tubimit, për të mos bllokuar lëvizjen e lirë të qytetarëve dhe automjeteve, jashtë perimetrit të tubimit”,-thuhet në njoftimin e Policisë së Shtetit.