Në AgroPikën e Lushnjës po vijon procesi i asistencës për fermerët që aplikojnë në Skemën Kombëtare të Mbështetjes në Bujqësi 2026, një nga programet kryesore të financimit në sektorin bujqësor për këtë vit.
Sipas të dhënave të bëra publike nga deputetja e Partisë Socialiste, Belinda Balluku, vetëm në pesë ditët e para të hapjes së aplikimeve janë regjistruar rreth 11 mijë aplikime në nivel vendi. Ky numër, sipas saj, tregon interes të lartë të fermerëve për skemën e këtij viti, e cila është hartuar pas një procesi konsultimesh në të gjithë territorin e vendit.
”Nga AgroPika e Lushnjës, ku fermerët po marrin asistencë për aplikimin në Skemën Kombëtare të Mbështetjes në Bujqësi 2026. Vetëm 5 ditë nga hapja e aplikimeve janë regjistruar rreth 11 mijë aplikime, një tregues i interesit të lartë të fermerëve për skemën e këtij viti, e ndërtuar mbi konsultimet e zhvilluara në të gjithë vendin dhe e orientuar drejt rritjes së mbështetjes për sektorin bujqësor, në përputhje me standardet e Bashkimit Europian. Aplikimet do të vijojnë deri më 26 qershor”,-shkruan Balluku.
