Ministri i Mjedisit, Sofjan Jaupaj mori pjesë në takimin rajonal të kryenegociatorëve për integrimin në Bashkimin Evropian të vendeve të Ballkanit Perëndimor, që po zhvillohet në Shkup. Ministri Jaupaj informoi përmes një videomesazhi në rrjetet sociale, se në fokus të takimit ishte buxheti i ri i Bashkimit Evropian për periudhën 2028-2034.
Jaupaj bëri të ditur se në takim, së bashku me përfaqësues të Komisionit Evropian, po diskutohen çështje që lidhen me procesin e integrimit evropian, ndërsa një vëmendje e veçantë i kushtohet dimensionit mjedisor.
“Buxheti i ri i Bashkimit Evropian do të duhet të parashikojë edhe mekanizmat e duhur për vendet të cilat do të jenë pjesë e Bashkimit Evropian, siç është Mali i Zi dhe Shqipëria, në formën e kryesuesve që ndodhemi sot”, u shpreh Jaupaj.
“Ky diskutim do të vlejë jashtëzakonisht shumë për mënyrën se si ne do të fillojmë dhe të përdorim fondet e Bashkimit Evropian dhe fondet që vijnë nga Unioni dhe nga anëtarësimi në zbatimin e projekteve dhe infrastrukturës së nevojshme që duhet për të arritur të gjitha standardet”, tha ai.
Takimi rajonal synon të kontribuojë në përshpejtimin e reformave dhe përafrimin e vendeve të Ballkanit Perëndimor me standardet e Bashkimit Evropian, me çështjet mjedisore që përbëjnë një prej fushave të rëndësishme të procesit të integrimit.