Vidhnin banesa në Patos dhe jo vetëm, në pranga tre persona

Tre persona janë vënë në pranga në Patos, pasi dyshohen si autorë të disa vjedhjeve të banesave në zonë.

Të arrestuarit dyshohet se janë përfshirë edhe në raste të tjera vjedhjesh në qarqet Fier dhe Gjirokastër.

Në kuadër të një operacioni të zhvilluar nga shërbimet e Komisariatit të Policisë Fier, në bashkëpunim me Forcën e Posaçme “Shqiponja”, u arrestuan shtetasit F. Gj., 43 vjeç, banues në Gjirokastër; D. A., 31 vjeç, banues në Gjirokastër; dhe I. I., 41 vjeç, banues në Tepelenë.

Tre të dyshuarit u kapën në qendër të Patosit, ndërsa lëviznin me një automjet. Gjatë kontrollit fizik, policia i gjeti shtetasit F. Gj. një sasi lënde narkotike të dyshuar cannabis sativa, e cila u sekuestrua në cilësinë e provës materiale.

Kontrolli vijoi edhe në banesën e shtetasit D. A., ku shërbimet e Policisë gjetën dhe sekuestruan një tjetër sasi lënde narkotike të dyshuar cannabis sativa.

Nga hetimet e kryera deri tani, dyshohet se tre personat kanë kryer dy vjedhje banesash më 5 dhe 6 gusht, në lagjen “1 Maji” dhe në fshatin Dukas të Patosit. Sipas Policisë, në këto raste janë marrë bizhuteri floriri, 3,500 euro dhe dy telefona celularë.

Ndërkohë, më 9 shtator, të tre dyshohet se kanë tentuar të vjedhin edhe dy banesa në fshatin Zharrëz të Patosit.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprat penale “Vjedhja” dhe “Prodhimi dhe shitja e lëndëve narkotike”.