Vokshi mesazh Rakip Sulit në Kamëz: Mos guxoni të dhunoni votën, e të kërcënoni votuesit
Deputetja e PD-së, Albana Vokshi, ka mbajtur fjalën në Kamëz gjatë prezantimit të kandidatëve të PD për zgjedhjet vendore të 11 majit. Ajo u shpreh se qytetarët janë të braktisur dhe të zhgënjyer nga qeveria e Edi Ramës. Sipas saj, Kamza dhe qytetarët e saj trajtohen si qytetarë të dorës së dytë. Vokshi paralajmëroi administratën publike të mos cënojë votën e lirë. Ajo e mbylli fjalën me thirrjen për t’i rikthyer dinjitetin Kamzës dhe për të çliruar Shqipërinë nga regjimi më 11 maj.
Pjesë nga fjala
Jam sot para jush për të përcjellë një thirrje zemre, një thirrje ndryshimi që vjen nga çdo derë që kam trokitur, nga çdo qytetar që kam takuar këto ditë. Kam takuar nëna që qanin me pikën e lotit sepse kanë mbetur vetëm, pa fëmijët që i kanë larg në emigrim, të detyruar të iknin prej politikave antihumane, politikave antikombëtare të Edi Ramës. Më besoni nuk është e rastësishme që arsimi është sot në ditën më të zezë sepse i paarsimuari Edi Rama, do që edhe qytetarët të jenë të tillë që të sundojë më lehtë. Kam takuar studentë të shkëlqyer që ndihen të humbur sepse shokët e tyre janë larguar. Nuk shohin asnjë derë të hapur, asnjë mundësi, sepse në pushtetin e Edi Ramës dhe në bashkinë që drejtohet nga Rakip Suli punësohen vetëm patronazhistët e partisë, jo të rinjtë e ditur dhe të ndershëm.
Kam takuar pensionistë të cilëve nuk u del pensioni as për bukë e ilaçe. Duan të jetojnë me dinjitet, po shteti i ka lënë në mëshirë të fatit. Kam takuar biznese të vogla që janë detyruar të fusin paratë që i sjellin fëmijët nga emigracioni për ta mbajtur hapur aktivitetin sepse taksat mbytëse dhe gjobat abuzive po u marrin frymën. Kam takuar banorë të mirë të Kamzës që Edi Rama dhe Rakip Suli i trajtojnë si banorë të dorës së dytë. Të përbuzur, të diskriminuar vetëm se nuk e kanë shitur dinjitetin e tyre për një thes me ushqim apo për një vend pune sezonal.
Kamza është qyteti i sakrificës, Kamza është qyteti i punës, Kamza është qyteti i dinjitetit, dhe le t’ia kthejmë Kamzës dinjitetin më 11 maj. Unë kam një mesazh për Rakip Sulin, kam një mesazh për të gjithë drejtuesit e administratës publike, çdo drejtues të bashkisë. Kam një mesazh për çdo nëpunës të administratës publike që sot po bën patronazhistin: mos guxoni të dhunoni votën, mos guxoni të vidhni votën e të kërcënoni votuesit. Kushdo që bën krime elektorale do ndëshkohet herët a vonë, do ndëshkoheni për çdo votë të vjedhur, do ndëshkoheni për çdo votë të dhunuar. 11 maji po vjen, braktisja e Kamzës dhe Shqipërisë do të marrë fund, më 11 maj e çlirojmë së bashku nga regjimi Kamzën. Më 11 maj le të çlirojmë Tiranën, le të çlirojmë Shqipërinë nga sundimi.
