Vrasja e efektivit, kush dështoi? Nën hetim çdo hallkë e Policisë së Shtetit

Familjarë, kolegë dhe qytetarë i dhanë lamtumirën e fundit efektivit të forcës “Shqiponja”, Enea Mekolli, i cili humbi jetën gjatë një operacioni policor në Lozhan të Maliqit. Ndërkohë, Prokuroria e Korçës dhe Agjencia e Mbikëqyrjes Policore kanë nisur hetime të detajuara për të zbardhur nëse operacioni ishte planifikuar dhe zhvilluar sipas procedurave të parashikuara.

Hetimet janë përqendruar te vlerësimi i rrezikshmërisë së objektivit, Violand Braçellari, si dhe te vendimi për të mos angazhuar struktura të specializuara si RENEA apo forca të tjera operacionale. Po verifikohet gjithashtu nëse numri i efektivëve në terren ka qenë i mjaftueshëm dhe nëse janë përdorur të gjitha mjetet e nevojshme për një operacion të tillë.

Një tjetër fokus i hetimeve është zinxhiri komandues dhe koordinimi institucional, pas deklaratës së Drejtorit të Përgjithshëm të Policisë së Shtetit se nuk kishte dijeni për operacionin. Përgjigjet e këtyre pyetjeve pritet të përcaktojnë nëse ka pasur shkelje procedurale apo përgjegjësi në operacionin tragjik që i kushtoi jetën efektivit Enea Mekolli dhe la të plagosur një tjetër punonjës policie.