Vetëgjyqësi u bë mesditën e sotme pranë Gjykatës së Tiranës, ku viktimë mbeti Kudret Saliaj dhe i plagosur ish-prokurori Adriatik Cama, aktualisht avokat. Ai ishte ulur në kafe me viktimën dhe autori është vjehrri i viktimës, Mexhit Picari. Vrasja ka ndodhur para seancës që ky i fundit kishte me vajzën e autorit për divorcin. Viktima kishte kërkuar ndarjen, teksa çifti kishte 3 fëmijë. Sot pritej të lexohej akti se kush do t’i mbante fëmijët, ku gjykata do pyeste djalin e madh të çiftit se me cilin nga prindërit donte të rrinte.
Analisti Zheji thekson se babai i tha burgut hapu, për të shpëtuar vajzën nga ferri, pasi e bija nuk gjeti drejtësi në gjykata. Ndërsa, Lala vlerësoi se nëna ishte e dhunshme, sipas vendimit të gjykatës.
Artur Zheji: Mesa kuptoj, ky është raportim që lë shumë për të dëshiruar. Raportimi është maskilist, i diktuar nga forca e një mashkulli, i besoj Dhuratës, ka jetuar nën presion, në një familje ku është bullizuar kundër saj, kur ka shkuar në duart e komisariateve dhe të gjykatave dhe kanë favorizuar prapë mashkullin. Kjo ka detyruar babain, kur ka parë se nuk ka pasur drejtësi në instancat e shtetit, kur ka parë dhunimin e poshtërimin, i ka thënë burgut hapur për të vënë drejtësi për vajzën. Vjehrri vret dhëndrin dhe këtë e bën një baba për vajzën e tij. Kjo është vetëgjyqësi, pasi babai shpëtoi vajzën nga ferri. Kuptoj mekanizmin e babait, ka vepruar për të shpëtuar vajzën.
Klodiana Lala: Gjykata kërkon që fëmijët të mbeten në kujdestari të Kudret Saliajt, duke thënë se nëna ishte e dhunshme. Gjysmë orë përpara se të ndodhte seanca, avokat ishte Cama. Cama dhe Saliaj po pinin kafe dhe është afruar Picari e ka vrarë Saliajn, por ka plagosur edhe avokatin. Gjykata ishte e bindshme se nëna ishte e dhunshme dhe i ka lënë nënës një orar takimi çdo fundjavë. Nuk kemi raportim maskilist. Nuk jemi të bindur se Mexhit Picari është person me probleme mendore. Nuk mund të amnistohet vrasja.