Washington, Bardhi takon Ndihmës Prokuroren e Përgjithshme të SHBA, Harmeet K. Dhillon

Kreu i Grupit Parlamentar të Partisë Demokratike, Gazment Bardhi ka zhvilluar një takim në Shtetet e Bashkuara të Amerikës me një nga figurat e rëndësishme të Departamentit të Drejtësisë.

Përmes një njoftimi në rrjetet sociale, Bardhi bëri të ditur se është pritur në zyrë nga Harmeet K. Dhillon, e cila mban postin e Ndihmës Prokurores së Përgjithshme të SHBA.

Bardhi e ka cilësuar këtë takim dhe qëndrimin e zyrtarëve amerikanë si një sinjal shpresëdhënës për Shqipërinë. Ai theksoi se SHBA ka vendosur prioritet absolut goditjen e rrjeteve të trafikut të drogës. “Përkushtimi i SHBA për të vendosur në krye të axhendës së sigurisë luftën ndaj karteleve të drogës dhe bashkëpunëtorët e tyre, është një lajm i mirë për Shqipërinë,” shkruan Bardhi.

Kreu i grupit të demokratëve nënvizoi se rruga e vetme për integrimin e vendit kalon përmes pastrimit të krimit dhe korrupsionit. “Lufta me tolerancë zero ndaj krimit të organizuar dhe korrupsionit është e vetmja mënyrë që Shqipëria të ecë përpara, si një vend i denjë për të qenë anëtar i NATO-s dhe si vend kandidat për në BE,” përfundon reagimi i Bardhit nga Washingtoni.