Presidenti Bajram Begaj zhvillon ditën e sotme konsultimet me përfaqësuesit e partive politike për përcaktimin e datës së zgjedhjeve vendore të vitit 2027, në një proces që nis me refuzimin e ftesës nga pjesa më e madhe e opozitës.
Takimi i parë nisi në orën 09:00 me kreun e grupit të PS, Taulant Balla, ndërsa në orën 11:00 në Presidencë do të mbërrijnë përfaqësuesit e Partisë Social-Demokrate, të drejtuar nga Tom Doshi.
Bëhet me dije se Taulant Balla i ka thënë kreut te shtetit se “PS është e gatshme për çdo datë përveç 2 majit”.
Ndërkohë, Partia Demokratike, Partia e Lirisë, Partia Mundësia, Lëvizja Shqipëria Bëhet dhe Lëvizja Bashkë kanë bërë të ditur se nuk do të shkojnë në takim me kreun e shtetit. Theksojmë se ky bojkot nuk vjen si një vendim i përbashkët por është një qëndrim paralel i secilës palë.
Sekretari i Përgjithshëm i Partisë së Lirisë, Tedi Blushi, i është drejtuar me një letër Presidentit, të cilit i thotë se “vendi ndodhet në kushtet e një krize të rëndë politike dhe PL s’mund të marrë pjesë në procedura formale për data zgjedhjesh”.
Begaj ka thirrur partitë parlamentare në konsultime përpara dekretimit të datës së zgjedhjeve lokale, të cilat do të zhvillohen në pranverën e vitit 2027.
Sipas Kodit Zgjedhor, zgjedhjet duhet të mbahen në një ditë të diel, brenda periudhës 15 prill-15 maj 2027. Afati i fundit për shpalljen e datës është 6 nëntori.
Deri më tani, asnjë nga partitë nuk ka propozuar publikisht një datë konkrete. Muaji maj shihet si periudha më e mundshme për zhvillimin e zgjedhjeve, ndërsa 2 maji përjashtohet pasi përkon me Pashkët Ortodokse. Një nga datat që mbetet në diskutim është 9 maji, që përkon edhe me Ditën e Europës.
