Zhdukja e njerëzve, një krim i frikshëm në Shqipëri

Shqipëria po “tretet”, duke shënuar rënie të moshës së re të popullatës dhe të lindjeve. Por sikur të mos mjaftonin këto të dhëna nga INSTAT, kohët e fundit vendi po përjeton një krim të frikshëm, zhdukjen e njerëzve.

Informacione të rezervuara të Policisë së Shtetit, flasin për një numër të lartë të personave të zhdukur pa gjurmë. Por ndërsa ka midis tyre që janë larguar me deshirë, është i lartë numri i atyre që janë zhdukur nga krimi. Ekspertët flasin për një luftë të egër midis kriminelëve që kanë nisur të pastrojnë dëshmitarët dhe bashkëpunëtorët.

Zhdukja e personave pa lënë gjurmë po konsiderohet nga krimet më të frikeshme, prej shërbimeve të posaçme. Në Vlorë diskutohet mbi 25 persona që nuk dihen ku ndodhen. Dhe për ta dyshohet se janë viktimë e pengmarrjes dhe më pas e vrasjes. Bëhet fjalë për persona në borxh me pagesat e drogës, ose të përfshirë në krime. Spastrim i territorit ose zhdukja e dëshmitarëve që kanë dijeni ose kanë kryer vrasje me porosi. Ky është përkufizimi që eskpertët po i japin situatës së krijuar në vend.

Qytetet

Më të prekur nga ky krim i egër janë: Vlora, Durrësi, Shkodra dhe Tirana. Flitet për krime të tilla që, pasi personi rrëmbehet pa lënë gjurmë, vritet dhe groposet ose hidhet në det. Megjithatë duket se policia nuk është shumë e orientuar në këtë drejtim. Mungojnë bashkëpunëtorët dhe zbulimi i provave.

Rastet e bujshme

Rastet më të bujshme janë zhdukja e Albasano Xhaferri 34-vjeç nga Vlora dhe ajo e Elvis Troqe. Xhaferri është zhdukur që në muajin qershor dhe bashkë me Troqin ishin persona që vinin nga vendet e Evropës. Më herët referuar denoncimet të familjarëve ishte zhdukur biznesmeni Adriano Jaho, 52-vjeç dhe ndihmësi i tij, Ariseld Maze, 28-vjeç. Jaho dhe Maze kanë dalë më 3 korrik të 2017-s në mëngjes nga Porti i Vlorës për të provuar një skaf dhe nuk u kthyen. Ksandro Imeraj, 32-vjeç, është një tjetër i ri i zhdukur në Vlorë. Me bujë është përcjellë në publik edhe zhdukja e dajë e nipi në Shkodër. Gëzim Hysaj, 56-vjeç dhe nipi i tij Agron Molla, 47-vjeç janë larguar më 23 gusht nga banesat e tyre ne Dobrac dhe nuk janë kthyer më. Vëllai i Hysajt, ka folur për natën e zhdukjes së vëllait të tij. ”Pasdite na thotë që më kërkon një shok, Faroku, i thotë gruas së tij: Më bëj bukën gati se po vi”, iku dhe nuk u kthy më”, rrëfeu vëllai i Gëzim Hysaj, disa ditë më parë në emisionin ”Top Story”. Por personi që Gëzimi takoi në të vërtetë nuk u gjet kurrë. Në familjen e Gëzimit shpresa mungon dhe apeli i familjarëve të tij është që të paktën të gjendet trupi. ”Të gjendet të paktën një shenjë por varet se nga i kanë tretur ata”,-thotë i vëllai.