Zjarr i fuqishëm në Daias, flakët përhapen me shpejtësi. Nis evakuimi i banorëve në lagjen Abaze në Krujë

Në Shqipëria ka disa vatra aktive zjarri në zona të ndryshme. Një zjarr i përmasave të mëdha ka përfshirë zonën e Daias në Tiranë, duke shkaktuar një re të dendur tymi që është e dukshme nga larg.

Në terren kanë mbërritur forcat zjarrfikëse, të cilat po punojnë për izolimin dhe shuarjen e flakëve. Në operacion është angazhuar edhe një helikopter i Forcës Ajrore. Deri më tani, nuk raportohet rrezik për banesat, pasi zjarri ka përfshirë kryesisht një zonë me bimësi të dendur dhe shkurre.

Nga ana tjetër, po situatë alarmante po kalon qyteti i Krujës, ku vatrat e zjarrit po përparojnë me shpejtësi drejt zonave të banuara. Për shkak të rrezikut të drejtpërdrejtë për jetën dhe pronën e qytetarëve, autoritetet kanë nisur me urgjencë evakuimin e banorëve në lagjen “Abaze”.

Flakët po ushqehen nga erërat dhe bimësia e tharë, duke u afruar rrezikshëm pranë shtëpive. Të ndodhur para këtij rreziku, banorët e lagjes janë detyruar të braktisin shtëpitë e tyre dhe të evakuohen.