Kryetari i bashkisë Pukë, Rrok Dodaj tha se deri tani janë përfshirë nga flakët rreth tre mijë hektarë sipërfaqe, duke theksuar se dyshohet që zjarret të jenë të qëllimshme.
Gjatë një prononcimi nga fshati Gojan i Vogël, ku zjarri vijon të jetë aktiv, Dodaj tha se për momentin banesat nuk paraqiten në rrezik të drejtpërdrejtë.
Dodaj e cilësoi si kriminale djegien e pyjeve, ndërsa nënvizoi dëmet e shkaktuara jo vetëm në masivin pyjor, por edhe te pasuritë natyrore që kanë shërbyer ndër vite si burim të ardhurash dhe ushqimi për banorët e zonës.
“Është kriminale djegia e pyjeve”, u shpreh Dodaj, duke kërkuar ndërhyrje për shuarjen e vatrave dhe ndalimin e përhapjes së mëtejshme të flakëve.
Autoritetet vijojnë të mbajnë nën monitorim banesat dhe zonat e banuara, ndërsa prioritet mbetet mbrojtja e jetës së banorëve dhe parandalimi i përhapjes së zjarrit drejt zonave të banuara.