Kreu i Agjencisë së Mbrojtjes Civile, Haki Çako thotë se situata e zjarreve në vend vijon të jetë problematike në zonat e Priskës dhe Krujës, ku janë përqendruar edhe ndërhyrjet nga ajri. Çako tha se në Krujë vijojnë të jenë aktive disa vatra të vogla, të mbetura brenda perimetrit të zjarrit të madh, ndërsa strukturat operacionale po punojnë për shuarjen e tyre.
“Pas një nate të gjatë pune në Krujë, ku kaloi pa pasoja në banesa, mjedise të tjera apo në njerëz, ne jemi angazhuar në disa territore të tjera”, tha Çako. Ai bëri të ditur se një tjetër vatër është shfaqur në hyrje të qytetit të Krujës, ku ndërhyrja nisi gjatë ditës së djeshme dhe vijon edhe sot. Sipas Çakos, në terren janë angazhuar rreth 1500 forca policore, mbi 1400 efektivë të mbrojtjes nga zjarri dhe më shumë se 1000 forca ushtarake.
“Qendra Kombëtare e Emergjencave Civile menaxhon 24/7 dhe vlerëson informacionin në kohë reale. Po ashtu koordinon strukturat qendrore të Policisë dhe urgjencës”, u shpreh ai. Çako theksoi se Priska dhe Kruja konsiderohen dy pikat më nevralgjike, ku është kërkuar edhe mbështetje nga ajri. Kreu i Emergjencave Civile deklaroi se deri tani Shqipëria nuk ka pasur nevojë t’i drejtohet mekanizmit europian ERCC në Bruksel për asistencë.
Sa i përket shkaqeve të zjarreve, Çako tha se shumica dyshohet se lidhen me aktivitetin njerëzor, ndërsa disa raste mund të jenë aksidentale dhe të tjera të qëllimshme. “Shumica e zjarreve janë kryesisht nga dora e njeriut, disa aksidentale, disa dhe ngjarje kriminale, për interesa të caktuara. Me këto hetime merret Policia e Shtetit”, deklaroi Çako.