Situata nga zjarri në Parkun Kombëtar të Lurës mbetet kritike, ndërsa përpjekjet për izolimin e flakëve po përballen me vështirësi të shumta. Era e fortë dhe terreni i thepisur kanë penguar ndërhyrjen efektive të forcave të angazhuara në terren, duke bërë që vatra e zjarrit të mbetet aktive prej disa ditësh.
Sipas informacioneve të fundit nga zona, flakët janë përhapur në një vatër të vetme, por që ka marrë përmasa për shkak të kushteve atmosferike dhe konfigurimit të vështirë të terrenit. Zjarri është përhapur në një zonë me bimësi të rrallë, përfshirë drurë ahu, pisha dhe bimësi barishtore.
Në operacionin për shuarjen e flakëve janë angazhuar 6 forca të MZSH-së, 16 punonjës të ADZM-së, 5 punonjës të njësisë administrative Lurë, 12 vullnetarë si dhe 30 efektivë të Forcave të Armatosura. Megjithatë, për shkak të kushteve të vështira, ndërhyrja për shuarjen e zjarrit po ecën me ritme të ngadalta.
