Zjarri në Shkozet nën kontroll, drejtori Troplini: Një efektiv ende në spital

Një ditë pas zjarrit masiv që përfshiu një magazinë në zonën e Shkozetit në Durrës, situata paraqitet nën kontroll. Drejtori i MZSH Durrës, Shkëlqim Troplini, deklaroi se flakët janë shuar, ndërsa në terren vijojnë të qëndrojnë efektivë zjarrfikës për monitorimin e disa vatrave të vogla.

Sipas Troplinit, zjarri është neutralizuar gjatë orëve të para të mëngjesit, por për shkak të rrezikut të riaktivizimit të flakëve, shërbimi zjarrfikës mbetet në gatishmëri. “Zjarri ka përfunduar komplet. Aktualisht kemi disa vatra të vogla që po mbahen nën kontroll nga një grup zjarrfikësish të vendosur në vendngjarje”, u shpreh ai.

Gjatë ndërhyrjes së gjatë, disa zjarrfikës kanë pasur shqetësime shëndetësore për shkak të lodhjes, temperaturave të larta dhe ekspozimit ndaj tymit. Troplini bëri me dije se shumica kanë marrë ndihmën e parë dhe janë larguar, ndërsa vetëm një efektiv vijon të kryejë kontrolle më të specializuara mjekësore.

Duke folur për shkaqet e zjarrit, drejtori i MZSH tha se dyshimet paraprake lidhen me djegien e kartonëve, mbeturinave dhe barishteve pranë magazinës. Ai sqaroi se ende nuk ka një përfundim zyrtar nga ekspertiza, pasi zjarri mund të ketë ardhur si pasojë e pakujdesisë ose edhe nga një veprim i qëllimshëm. “Presim rezultatet e grupit të ekspertizës për të përcaktuar me saktësi shkakun e zjarrit”, deklaroi Troplini.